بریٹ لی اتوار سے قبل ہی تکلیف محسوس کر رہے تھے

شبہ ہے کہ وہ جمعرات سے اولڈ ٹریفورڈ میں شروع ہونے والے ایشز سیریز کے تیسرے ٹیسٹ میں حصہ نہیں لے سکیں گے۔

آسٹریلوی ٹیم کے فزیوتھراپسٹ ایرل الکاٹ کا کہنا تھا کہ ’ہسپتال میں ڈاکٹروں نے بریٹ لی کا معائنہ کیا ہے اور وہ ان کی بہتری سے مطمئن ہیں‘۔

الکاٹ نے یہ بتانے سے انکار کر دیا کہ بریٹ لی کس ہسپتال میں ہیں تاہم ان کا کہنا تھا کہ بریٹ لی کو بدھ کو ہسپتال سے فارغ کیا جائے گا جس کے بعد وہ مانچسٹر جائیں گے اور وہاں ان کا فٹنس ٹیسٹ لیا جائے گا۔

فٹنس ٹیسٹ کے بعد ہی تیسرے ٹیسٹ کے لیے ٹیم میں ان کی شمولیت کا فیصلہ ہو گا۔

آسٹریلوی ٹیم کے فزیوتھراپسٹ کا کہنا ہے کہ بریٹ لی اتوار سے قبل ہی تکلیف محسوس کر رہے تھے۔ انہوں نے کہا کہ ’ میں نے پیر کو بریٹ لی کا معائنہ کیا تھا اور وہ اپنے سوجے ہوئےگھٹنے کے بارے میں فکرمند تھا‘۔

ایجبسٹن ٹیسٹ کے دوران بریٹ لی کو برطانوی بولروں کی تیز بولنگ کا سامنا کرنا پڑا تھا اور اس دوران متعدد بار گیند ان کے جسم پر بھی لگی تھی تاہم کہا جا رہا ہے کہ بریٹ لی کے گھٹنے پر لارڈز ٹیسٹ کے دوران چوٹ لگی تھی۔

یاد رہے کہ آسٹریلوی تیز بالر میگرا پہلے ہی زخمی ہیں اور اس موقع پر بریٹ لی کی چوٹ آسٹریلوی ٹیم کے لیے خطرے کی گھنٹی ثابت ہو سکتی ہے۔

ایشز سیریز کے تیسرے ٹیسٹ کے لیے بریٹ لی کی عدم دستیابی کو صورت میں سپنر سٹیورٹ میکگل کو ٹیم میں شامل کیے جانے کا امکان ہے کیونکہ اولڈ ٹریفورڈ کی وکٹ عام طور پر سپن بالوں کو مدد دیتی ہے۔