ہارون رشید بی بی سی اردو ڈاٹ کام، پشاور

دلی کی ٹیم ایبٹ آباد اور مردان میں بھی میچ کھیلے گی

ارباب نیاز کرکٹ سٹیڈیم میں روایتی خٹک ڈانس کی موسیقی میں اس سیریز کا افتتاح وزیر اعلی سرحد اکرم خان درانی نے کیا۔

دلی کی ٹیم نے یہ میچ سرحد کی اکاونٹنٹ جنرل الیون کے خلاف کھیلا۔ پشاور کی ٹیم نے ٹاس جیت کر دلی کو پہلے بیٹنگ کی دعوت دی۔ مقررہ تیس اورز میں دلی الیون نے سات کھلاڑیوں کے آوٹ ہونے پر دو سو نو رنز بنائے۔ آدیتہ جین نے اکانوے جبکہ کرن رے نے چھپن رنز بنائے۔

میچ سے پہلے خٹک ڈانس پیش کیا گیا

جواب میں اکاونٹنٹ جنرل الیون تیس اوروں میں چھ وکٹوں کے نقصان پر صرف ایک سو ستتر رنز بنا سکی۔

دلی کرکٹ ٹیم سرحد میں پانچ ایک روزہ میچ مختلف ٹیموں سے کھیلے گی۔ پشاور میں دو میچوں کے علاوہ مردان، کوہاٹ اور ایبٹ آباد میں میچ منعقد کیے جائیں گے۔

دلی کی ٹیم کے کپتان ویرن کمار کو امید تھی کہ قومی سطح پر بھارت پاکستان مقابلوں کا رنگ ان کے میچوں میں بھی ظاہر ہوگا۔ انہوں نے بتایا کہ یہ ان کا پشاور کا پہلا دورہ ہے تاہم انہیں کوئی زیادہ مختلف دکھائی نہیں دیا۔

دلی ڈسٹرکٹ کرکٹ ایسوسی ایشن کے سیکریٹری سنیل دیو نے اب تک کی مہمان نوازی کا ذکر کرتے ہوئے کہا کہ پشاور اس میں جیت گیا ہے۔ انہوں نے بھارت کی قومی ٹیم کے برعکس پشاور آنے پر کسی قسم کے خطرے یا خوف کو رد کیا۔

دلی کی ٹیم میں بھارتی وزیر ریلوے لالو پرشاد کے بیٹے تیجسوی یادیو بھی شامل ہیں۔

سٹیڈیم میں سکول کے بچوں اور پولیس کے علاوہ مقامی تماشائی کم ہی نظر آئے۔