کولکتہ ٹیسٹ کے تیسرے دن بھارتی ٹیم نے بہتر کارکردگی کا مظاہرہ کیا ہے

جب خراب روشنی کے سبب کھیل روک دیا گیا اس وقت راہول ڈراوڈ 54 جبکہ گنگولی 4 رن پر کھیل رہے تھے۔بھارت کو اس وقت پاکستان پر مجموعی طور پر 147 رن کی برتری حاصل ہوگئی ہے۔

سچن تندولکر نصف سنچری مکمل کرنے کے بعد عبدالرزاق کی گیند پر کامران اکمل کے ہاتھوں کیچ ہوگئے۔ انہوں نے52 رن بنائے۔بھارت کے آؤٹ ہونے والے پہلے کھلاڑی گوتم گمبھیر تھے جو 1 رن بنا کر محمد سمیع کی گیند پر بولڈ ہوگئے۔ سہواگ کو بھی محمد سمیع نے 15 رن پر بولڈ کیا۔

اس سے قبل پاکستانی ٹیم اپنی پہلی اننگز میں 393 رن بنا کر آؤٹ ہو گئی۔ بھارت نے اپنی پہلی اننگز میں 407 رن بنائے تھے اور یوں اسے پاکستان پر 14 رن کی سبقت حاصل ہو گئی ہے۔

تیسرے دن کے آغاز پر مستحکم پوزیشن میں دکھائی دینے والی پاکستان کی بیٹنگ بھارتی بولروں کی نپی تلی بالنگ کا مقابلہ نہ کرسکی اور اس کے آخری آٹھ کھلاری سکور میں صرف 120 رن کا ہی اضافہ کر سکے۔

بھارت کی جانب سے انیل کمبلے نے تین جبکہ بالا جی، عرفان پٹھان اور ہربھجن سنگھ نے دو دو کھلاڑیوں کو آؤٹ کیا۔

پاکستان کے آخری آؤٹ ہونے والے کھلاڑی محمد خلیل تھے جو 4 رن بنا کر کمبلے کی گیند پر سہواگ کے ہاتھوں کیچ ہوئے۔دنیش کنیریا 3 رن پر ناٹ آؤٹ رہے۔ ہیں۔

اس سے قبل محمد سمیع کو ہربھجن نے آؤٹ کیا۔عبدالرزاق 16 رن بنا کر کمبلے کی گیند پر آؤٹ ہوئے۔کامران اکمل بنا کوئی رن بنائے ہربھجن کی گیند پر تندولکر کے ہاتھوں کیچ آؤٹ ہوئے۔یونس خان نے147 رن بنائے۔ انہیں انیل کمبلے نے آؤٹ کیا۔ اس سے پہلے عاصم کمال 6 کے انفرادی سکور پر رن آؤٹ ہوئے اور انضمام الحق 30 رن بنا کر عرفان پٹھان کی گیند پر دنیش کارتیک کے ہاتھوں کیچ ہوگئے۔ یوسف یوحنا 104 رنز بنا کر بالاجی کا شکار بنے۔

میچ کے دوسرے روز تیسری وکٹ کی شراکت میں یونس خان اور یوسف یوحنا نے 203 رنز کا اضافہ کیا تھا اور ٹیم کو مشکل صورتحال سے باہر نکالا تھا کیونکہ 70 رنز پر دونوں اوپنرز پویلین لوٹ چکے تھے۔ دونوں اسٹروکس پلیئرز ہیں لہذا انہوں نے کسی بھی بولر کو خاطر میں لائے بغیر دلکش اسٹروکس کھیلے۔ البتہ چند مواقعوں پر رن لینے کی کوشش میں وہ رن آؤٹ کے خطرے سے دوچار دکھائی دیئے۔

کولکتہ ٹیسٹ کے لئے دونوں ٹیمیں یہ ہیں۔
پاکستان۔ انضمام الحق ( کپتان ) شاہد آفریدی، توفیق عمر، یونس خان، یوسف یوحنا، عاصم کمال، کامران اکمل ، عبدالرزاق، محمد سمیع، دانش کنیریا اور محمد خلیل۔

بھارت۔سورو گنگولی ( کپتان) گوتم گمبھیر، وریندر سہواگ، سچن ٹنڈولکر، راہول ڈراوڈ، وی وی ایس لکشمن، دنیش کارتک، عرفان پٹھان، انیل کمبلے، لکشمی پاتھی بالاجی اور ہربھجن سنگھ

امپائرز آسٹریلیا کے ڈیرل ہیئر اور ویسٹ انڈیز کے اسٹیو بکنر ہیں ۔ یہ بکنر کا سوواں ٹیسٹ میچ ہے۔میچ ریفری انگلینڈ کے کرس براڈ ہیں۔