عبدالرشید شکور بی بی سی اردوڈاٹ کام، کولمبو

انڈیا کے تیز بولر عرفان پٹھان اور ظہیر خان نے اپنے شروع ہی کے اوورز میں سری لنکا کے دو وکٹ حاصل کر لیے تھے۔

اس سے قبل چمندا واس اور متایا مرلی دھرن کے بغیر سری لنکن بولنگ اٹیک کے سامنے بھارت نے مقررہ پچاس اوورز میں6 وکٹوں کے نقصان پر271 رنز بنائے ہیں۔ یہ میچ بھارت کے لیے انتہائی اہمیت کا حامل ہے کیونکہ جیت اسے فائنل میں اور شکست وطن واپس لے جائے گی۔

سوروگنگولی نے ٹاس جیت کر پہلے بیٹنگ کا فیصلہ کیا۔ سری لنکا کو ساتویں اوور میں سچن ٹنڈولکر کی قیمتی وکٹ مل گئی جو 34 رنز بناکر نوآن سوئسا کی گیند پر ایل بی ڈبلیو ہوئے۔ جس کے بعد وریندر سہواگ اور کپتان گنگولی نے دوسری وکٹ کی شراکت میں134 رنز کا اضافہ کیا لیکن دونوں پر قسمت کی دیوی مہربان رہی۔ سہواگ6 اور33 رنز پر مہیلا جے وردھنے اور اوشکا گوناوردھنے کے ہاتھوں کیچ ہونے سے بچے۔ سوروگنگولی بھی پرویز معروف کی گیند پر ایل بی ڈبلیو ہونے سے بچ گئے۔ امپائر بلی ڈاکٹرو نے سورو گنگولی کے حق میں فیصلہ دیا۔ بھارتی کپتان کو35 کے اسکور پر بھی زندگی ملی جب چندانا کی گیند پر مہیلا جے وردھنے نے ان کا کیچ لے لیا جس پر سری لنکن کھلاڑیوں نے جشن منانا شروع کردیا تاہم ٹی وی امپائر اخترشاہین نے ناٹ آؤٹ قراردیا کیونکہ گیند پہلے زمین پر لگ چکی تھی۔

ان مواقعوں کے باوجود دونوں بیٹسمین سنچریاں اسکور نہ کرسکے۔ سہواگ81 رنزبناکر جے سوریا کی گیند پر سنگاکارا کے ہاتھوں کیچ ہوئے اور گنگولی کی79 رنز کا خاتمہ ملنگا کی گیند پر اپل چندانا نے کیچ لے کے کیا۔ یوراج سنگھ نے مخصوص جارحانہ انداز میں کھیلتے ہوئے پانچ چوکوں کی مدد سے 46گیندوں پر50 رنز بنائے۔سری لنکا کی طرف سے ملنگا دو وکٹوں کے ساتھ کامیاب بولر رہے کپتان اتاپتو نے چار اوورز میں صرف سترہ رنز کے عوض ایک وکٹ حاصل کرنے والے جے سوریا کو بعد میں استعمال ہی نہیں کیا جبکہ ان کی جگہ بولنگ کے لیے لائے گئے جیانتھا تین اوورز میں انیس رنز کے ساتھ مہنگے بولر ثابت ہوئے۔