علی سلمان لاہور

شائقین پاکستانی ٹیم کی شکست پر پہلے بھی ایسے مظاہرے کرتے رہے ہیں

یہ مظاہرہ اتوار کی سہ پہر لاہور کے علاقہ سنت نگر کے نہرو پارک کے سامنے کیا گیا مظاہرین نے ہاتھوں میں مختلف پوسٹر اٹھا رکھے تھے جن پر احتجاجی نعرے درج تھے ۔

مظاہرہ میں شریک تین چار ہیجڑے دیگر سو سے زائد مظاہرین کے ہمراہ نعرے بازی کررہے تھے اور یوں معلوم ہوتا تھا کہ کھیل کے میدان میں پاکستان کی بھارت کے ہاتھوں شکست پر انہیں بھی شدید غم وغصہ ہے لیکن بعد میں معلوم ہوا کہ یہ غم وغصہ بھی ان کی پرفارمنس کا حصہ تھی اور انہیں اس کا معقول معاوضہ دیا گیا تھا۔

مظاہرے میں سات آٹھ گدھے اپنے مالکان کے ہمراہ موجود تھے۔ ویسے تو یہ تمام گدھے دن بھر وزن سے لدی ریڑھیاں کھنچتے ہیں لیکن کرکٹ میں پاکستان کی پے درپے شکست نے اتوار کا روز گدھوں اور ان کے مالکان کے لیے اس لحاظ سے ایک خوشگوار بنا دیا کہ اس روز نہ صرف انہیں کام کیے بغیر بھاری معاوضہ مل گیا بلکہ گدھوں کے کھانے کے لیے گھاس بھی مفت ملی۔

مظاہرہ کے منتظم کرکٹر ویلفیئر ایسوسی ایشن کے چیئرمین ملک منظور مانی نے بتایا کہ انہوں نے فی گدھا پانچ سو روپے ادا کیے ہیں جبکہ ہیجڑوں کو بھی ان کی آمد کا معاوضہ دیا گیا ہے۔

ملک منظور مانی نے کہا کہ ہیجڑوں اور گدھوں کو اکٹھا کرنے کا مقصد لوگوں کی توجہ پاکستان کرکٹ ٹیم کی مسلسل شکست کے اسباب کی طرف دلانا ہے اور کرکٹ ٹیم کو یہ پیغام دینا ہے کہ وہ ہر صورت قوم کو لاہور کا ٹسٹ جیت کر دکھائیں۔