عبدالرشید شکور بی بی سی اردو ڈاٹ کام، ملتان

وریندر سہواگ کی ٹرپل سنچری

وہ ٹیسٹ کرکٹ میں ٹرپل سنچری سکور کرنے والے پہلے بھارتی بیٹسمین ہیں اس سے قبل وی وی ایس لکشمن نے مارچ 2001 میں آسٹریلیا کے خلاف کلکتہ ٹیسٹ میں 281 رنز کی اننگز کھیلی تھی ۔

سہواگ ٹیسٹ کے پہلے روز پاکستان کے خلاف کسی بھی بھارتی بیٹسمین کا بہترین انفرادی سکور کا ریکارڈ پہلے ہی توڑ چکے تھے جنہوں نے 1989 کی سیریز کے لاہور ٹیسٹ میں 218 رنز بنائے تھے ۔

ملتان ٹیسٹ سے پہلے کا ریکارڈ 20 ٹیسٹ، 1513 رنز، 195 زیادہ اسکور، 5 سنچریاں، 5 نصف سنچریاں، 24 کیچز، 3 وکٹیں، بہترین بولنگ 17 رنز کے عوض ایک وکٹ

282 پر پہنچ کر انہوں نے نہ صرف لکشمن کے بھارتی ریکارڈ کو بھی توڑا بلکہ پاک بھارت ٹیسٹ میچوں میں کسی بھی بیٹسمین کے سب سے بڑے انفرادی سکور کے ریکارڈ کو بھی اپنے نام کرلیا جو پاکستان کے جاوید میانداد کے نام تھا ۔ انہوں نے 83-1982کی سیریز کے حیدرآباد ٹیسٹ میں ناقابل شکست 280 رنز بنائے تھے ۔

سہواگ اور سچن تندولکر نے تیسری وکٹ کی شراکت میں 336 رنز کا اضافہ کیا جو ٹیسٹ کرکٹ میں بھارت کی کسی بھی ملک کے خلاف تیسری وکٹ کی ریکارڈ شراکت ہے اس سے پہلے یہ ریکارڈ 316 رنز کا تھا جو گنڈاپا وشواناتھ اور یشپال شرما نے 82-1981 میں انگلینڈ کے خلاف چنئی میں بنایا تھا ۔

سہواگ پاکستان کی سرزمین پر ٹیسٹ ٹرپل سنچری بنانے والے تیسرے بیٹسمین ہیں۔ 99-1998 میں آسٹریلوی کپتان مارک ٹیلر نے پشاور ٹیسٹ میں 334 رنز ناٹ آؤٹ کی اننگز کھیلی تھی اور 02-2001 میں نیوزی لینڈ کے خلاف لاہور ٹیسٹ میں انضمام الحق نے 329 رنز اسکور کئے تھے۔