اینڈی ایٹکنسن

دونوں ٹیموں نے اپنی اننگز کے دوران تین سو سے زیادہ رن بنا کر ایک روزہ میچوں میں بیٹنگ کے نئے ریکارڈ قائم کئے۔

حالیہ کرکٹ سیریز میں شامل برطانوی افراد کی تعداد بہت ہی کم ہے اور جو ہیں بھی وہ پریس باکس میں بیٹھتے ہیں۔

تاہم موجودہ کرکٹ سیریز میں اینڈی ایٹکنسن انتہائی اہم کام سے منسلک ہیں یعنی کھیل کے لئے پچیں تیار کرنا۔

ایٹکنسن کا تعلق لندن کے علاقے ایسکس سے ہے اور وہ کہتے ہیں کہ برطانیہ کے مقابلے میں برصغیر میں ان کا کام خاصا سہل ہے۔ کیونکہ انگلینڈ میں ہر پل بدلتے ہوئے موسم کے باعث پچ کو خشک رکھنے کے لئے بےحد جتن کرنے پڑتے ہیں لیکن اس کے برعکس برصغیر کی دھوپ یہ کام بہت آسان بنا دیتی ہے۔

اٹکنسن لندن کے لارڈز سٹیڈیم میں تین برس تک ہیڈ گراؤنڈزمین کے فرائض ادا کر چکے ہیں۔ ان کا کہنا ہے کہ انہوں نے حالیہ پاک بھارت سیریز کے لئے جو پچیں تیار کی ہیں وہ بلے بازوں کے لئے قدرے زیادہ سازگار ہیں اس لئے آئندہ یچوں میں بھی ٹیمیں زیادہ سکور کرتی نظر آئیں گی۔

انہوں نے کہا کہ پچوں کی تیاری کے دوران کسی کھلاڑی نے دخل اندازی نہیں کی ہے اور کرکٹ بورڈ نے ہمیں پوری اجازت دے رکھی ہے۔