عبدالرشید شکور
بی بی سی اردو ڈاٹ کام، راولپنڈی |  |
پاکستان کرکٹ ٹیم کے کپتان انضمام الحق اپنے بولرز کی سست روی پر جرمانے کی زد میں آگئے ہیں۔ آئی سی سی میچ ریفری رنجن مدوگالے نے راولپنڈی میں کھیلے گئے دوسرے ون ڈے انٹرنیشنل میں سلواوور ریٹ پر ان پر میچ فیس کا 80 فیصد جرمانہ عائد کردیا ہے ۔ پاکستانی بولرز نے مقررہ وقت میں چار اوورز کم کرائے تھے۔ آئی سی سی کے قوانین کے تحت اگر پاکستان کرکٹ ٹیم نے انضمام الحق کی قیادت میں ایک سال کے عرصے میں دوبارہ سلو اوور ریٹ کا مظاہرہ کیا تو انضمام الحق کو دو سے چار یا چار سے آٹھ ون ڈے انٹرنیشنل میچ کھیلنے پر پابندی کا سامنا کرنا پڑے گا۔ آئی سی سی نے سلو اووریٹ پر اپنے قوانین میں تبدیلی کی ہے۔ پہلے سست روی کا مظاہرہ کرنے والی ٹیم کے اوورز منہا کردیئے جاتے تھے لیکن اب اسے سخت کرکے کپتانوں کو اس کا ذمہ دار قرار دے دیا گیا ہے۔ پاکستان اور بھارت کے درمیان کراچی میں کھیلے گئے پہلے ون ڈے میچ میں بھی دونوں ٹیموں نے سست بولنگ کی تھی جس پر میچ ریفری رنجن مدوگالے نے دونوں کپتانوں پر میچ فیس کا 20 فیصد اور ٹیموں پر 10 فیصد جرمانہ عائد کیا تھا۔ بھارتی کپتان سورو گنگولی نے سلو اوور ریٹ پر کپتانوں کو ذمہ دار ٹھہرانے کے قانون پر تنقید کی ہے لیکن انضمام الحق نے جرمانے کے فیصلے پر کوئی تبصرہ کرنے سے انکار کردیا ہے۔ | 
یہ صفحہ دوست کو ای میل کیجیئے
پرِنٹ کریں
