عمران خان بی بی سی اردو کے لئے خصوصی تبصرہ

عمران خان

عمران نے کہا کہ پاکستانی بولرز نے بارہا نوبالز کیں، ایکسٹرا رن دئے لیکن پاکستان کے نکتہ نظر سے سب سے عجیب بات یہ تھی کہ اس کے بولروں نے تین کھلاڑیوں کو نوبالز پر آؤٹ کیا یعنی بھارت کے تین بہترین بلےبازوں کو میچ میں دو دو بار آؤٹ کیا۔

انہوں نے کہا کہ پاکستانی بولرز میں موجود اس ٹیلنٹ کے حوالے سے میں یہ کہنا چاہوں گا کہ پاکستان کرکٹ بورڈ کو اب ایک بولنگ کوچ کی ضرورت ہے تاکہ بولروں کے نوبالز اور وائڈ بول جیسے چھوٹے چھوٹے مسائل کو ختم کیا جا سکے۔

انضممام نے لاہور میں عمدہ سنچری بنائی

عمران خان نے کہا کہ پاکستانی بولروں کی طرف سے نوبالز اور وائڈ بالز کرانے کی وجہ یہ ہے کہ پاکستانی ٹیم کے کپتان، منیجر اور کوچ تینوں ہی بیٹسمین ہیں اور بولرز کے ساتھ ڈیل کرنے کے لئے ٹیم کے پاس کوئی ماہر موجود نہیں ہے۔

وضاحت کرتے ہوئے عمران خان نے کہا کہ جب کوئی اچھی ٹیم مدِمقابل ہو تو بولروں کے پاس نوبالز اور وائڈ بولز کرنے اور مخالف ٹیم کے ٹاپ بیٹسمینوں کو نوبالز پر آؤٹ کرنے کی گنجائش ہی نہیں ہوتی۔

انہوں نے کہا کہ اسی وجہ سے اب پاکستان کو ضرورت ہے کہ وہ اپنے بولرز کو مزید پروفیشنل بنانے کے لئے خصوصی طور پر ایک سپیشلسٹ بولر کی خدمات حاصل کرے۔

لاہور میں کھیلے گئے میچ میں پچ کے حوالے سے انضمام کی شاندار سنچری اور ڈراوڈ کی عمدہ اننگز کے باوجود سچن تندولکر اور سہواگ کے نہ چلنے کے بارے میں عمران خان نے کہا کہ اس کی وجہ صرف یہ ہے کہ دنیا کے تین تیز ترین بولرز میں سے دو یعنی شعیب اختر اور محمد سمیع پاکستان کے پاس ہیں۔

عمران نے لاہور کے میچ میں شعیب کی بولنگ کی تعریف کی اور کہا کہ دنیا میں شاید ہی کوئی ٹیم ایسی ہو جس کے پاس پاکستان جیسی فائر پاور موجود ہو۔

انہوں نے کہا کہ پاکستان کے فاسٹ بولرز نے ابتدا میں بھارتی ٹیم پر خاصا دباؤ ڈالا جسے وہ بعد میں نوبالز اور وائڈ بالز کرنے کے سبب برقرار نہ رکھ سکے، یوں گیند پرانا ہوتا چلا گیا اور بھارتی بلے باز وکٹ پر سیٹ ہوتے چلے گئے۔