 | | | | | | | ||||||||||||||||||||||||||||||||||
| | |||||||||||||||||||||||||||||||||||||||
|
پہلی جیت انڈیا کی | |||||||||||||||||||||||||||||||||||||||
کراچی میں کھیلے گئے پہلے ایک روزہ بین الاقوامی کرکٹ میچ میں انڈیا نے سنسنی خیر مقابلے کے بعد پاکستان کو پانچ رنز سے ہرا دیا۔ انڈیا کی ٹیم نے پہلے کھیلتے ہوئے مقررہ پچاس اورز میں سات وکٹوں پر تین سو انچاس رنز بنائے۔ پاکستان کی ٹیم کپتان انضمام الحق کی شاندار سینچری کے باوجود مطلوبہ سکور پورا نہ کر سکی۔ پاکستان کو میچ جیتنے کے لئے آخری گیند پر چھ رنز کی ضرورت تھی لیکن وکٹ کیپر معین خان اشیش نہرہ کی گیند پر ظہیر خان کے ہاتھوں کیچ آؤٹ ہو گئے۔ انڈین فاسٹ بالر اشیش نہرہ نے میچ کے آخری اوور میں پاکستانی بیٹسمینوں کو کھل کر نے کھیلنے دیا۔ انہوں نے اس اوور میں صرف تین رنز دیئے اور ایک وکٹ حاصل کی۔
میچ کا مجموعی سکور چھ سو ترانوے رہا جو ایک روزہ بین الاقوامی کرکٹ کا ایک ریکارڈ ہے۔ آج صبح پاکستان نے ٹاس جیت کر انڈیا کو بیٹنگ کی دعوت دی۔ انڈین اوپنر وریندرسہواگ نے ستاون گیندوں پر ایک چھکے اور چودہ چوکوں کے مدد سے اناسی رنز بناکر اپنے ٹیم کو ایک اچھا آغاز فراہم کیا۔ انڈیا کی طرف سے راہول ڈراوڈ نے ننانوے رنز بنائے۔ انہیں شعیب اختر نے بولڈ کیا۔ محمد کیف نے چھیالیس جبکہ کپتان سورو گنگولی نے پینتالیس رنز بنا کر اپنے ٹیم کے سکور میں قابل قدر اضافہ کیا۔ پاکستان کی طرف سے آل راؤنڈر رانا نوید الحسن نے تین جبکہ شعیب اختر اور محمد سمیع نے دو دو کھلاڑیوں کو آؤٹ کیا۔ پاکستان کو اپنی اننگز کے آغاز میں ہی مشکلات کا سامنا کرنا پڑا جب دونوں اوپنر بغیر کوئی بڑا سکور کئے پویلین لوٹ گئے۔
کپتان انضام الحق اور یوسف یوحنا کی شاندار پارٹنرشپ پاکستان کو میچ میں واپس لے آئی۔ انہوں نے تیسری وکٹ کی شراکت میں ایک سو پینتیس رنز بنائے۔ یوسف یوحنا نے اڑسٹھ گیندوں پر چار چھکوں اور پانچ چوکوں کے مدد سے تہتر رنز بنائے۔ یوسف یوحنا کے آؤٹ ہونے کے بعد انضمام الحق کا ساتھ دینے کے لئے یونس خان کھیلنے آئے اور چوتھی وکٹ کی شراکت میں ایک سو نو رنز بنے۔ انضام الحق نے ایک سو چار گیندوں پر دو چھکوں اور بارہ چوکوں کی مدد سے ایک سو بائیس رنز بنائے۔ انضمام الحق کے آؤٹ ہونے کے بعد یونس خان اور عبدالرزاق نے رنز بنانے کا سلسلہ جاری رکھا اور ایک مرحلے پر پاکستانی شائقین کو یہ امید نظر آنے لگی کہ ان کی ٹیم میچ جیت بھی سکتی ہے۔ میچ کے آخری دو اوورز فیصلہ کن ثابت ہوئے۔ محمد کیف نے ایک شاندار کیچ لے کر شعیب ملک کو پویلین کی راہ دکھائی۔ شعیب ملک کے ایک غیر ضروری شاٹ کھیلتے ہوئے آؤٹ ہونے کے بعد بھارتی بالر میچ کو پاکستان کی پہنچ سے دوور لے گئے۔ میچ کی آخری گیند پر پاکستان کو چھ رنز کی ضرورت تھی لیکن معین خان کراچی کے اس سنسنی خیر مقابلے کو شارجہ میں کھیلے گئے فائنل مقابلے کی سطح پر نہ لا سکے اور ایکسٹرا کور پر ایک کیچ تھما کر چلتے بنے۔ | 
| |||||||||||||||||||||||||||||||||||||||
| ||||||||||||||||||||||||||||||||||||||||
| ||||||||||||||||||||||||||||||||||||||||
یہ صفحہ دوست کو ای میل کیجیئے
پرِنٹ کریں
