یہ صفحہ دوست کو ای میل کیجیئے		پرِنٹ کریں

نازیبا الفاظ استعمال کرنے کا الزام

انگلینڈ کے کھلاڑی ناصر حسین سری لنکا کے سپنر میتوھیا مرلی دھرن کے خلاف نازیبا الفاظ استعمال کرنے کے الزام سے بچ گئے ہیں۔

سری لنکا نے کینڈی ٹیسٹ میں انگلینڈ کے سابق کپتان کے خلاف باضابطہ طور پر شکایت کی تھی۔

ناصر حسین پر الزام تھا کہ انہوں نے مرلی دھرن کے خلاف اس وقت نازیبا الفاظ استعمال کیے جب وہ جمعرات کو بیٹنگ کرنے گئے تھے۔

مرلی دھرن نے فوراً اس واقعہ کی اطلاع دونوں ایمپائروں، علیم ڈار اور ڈیرل ہارپر کو دی۔

میچ ریفری کلائیو لائیڈ نے اس بات کی تصدیق کی کہ انہیں شکایت موصول ہوئی تھی اور انہوں نے اس کے بعد ناصر حسین اور ڈنکن فلیچر کو بھی صفائی کے لیئے بلایا تھا۔

اگرچہ کلائیو لائیڈ نے حسین کو الزام سے بری کر دیا لیکن ساتھ ساتھ انہوں نے اس بات پر بھی مایوسی کا اظہار کیا کہ ایسا ماحول کیوں بنا کہ انہیں کھلاڑیوں کی پیشی کرنی پڑی۔

انہوں نے کہا: ’اس طرح کی چیزوں سے کرکٹ کا کھیل متاثر ہوتا ہے‘۔

میچ کی ویڈیو کے ثبوت دیکھنے کے بعد انہوں نے کہا کہ اس میں کہیں بھی یہ ثابت نہیں ہو سکتا تھا کہ حسین نے وہ الفاظ کہیں ہیں جن کا ان پر الزام ہے۔

انہوں نے مزید کہا کہ ’یہ واضح ہے کہ کچھ کہا گیا لیکن اصل میں کیا الفاظ استعمال ہوئے اس کا کوئی ثبوت نہیں‘۔