اولمپک مشعل برازیل کے حوالے کر دی گئی

اولمپک مشعل ایتھنز میں برازیل کے حکام کے حوالے کر دی گئی ہے اور یہ تین مئی کو دارالحکومت براسیلیا پہنچے گی۔

ریو اولمپکس کے آغاز میں 100 دن رہ گئے ہیں اور آئندہ ہفتے مشعل کے برازیل پہنچنے کے بعد اسے ملک بھر میں لے جایا جائے گا۔

* 100روز بعد ریو اولمپکس کا آغاز

دوسری جانب اولمپک کے میزبان شہر ریو ڈی جنیرو کے میئر ایڈورڈو پیز کا کہنا ہے کہ اولمپک پارک تقریباً تیار ہو گیا ہے تاہم چند منصوبوں میں تاخیر ہو سکتی ہے۔

ریو اولمپک کی انتظامی کمیٹی کے سربراہ کارلوس نزمین نے کہا ہے کہ مشعل برازیلی حکام کے حوالے کر دی گئی ہے اور اب شہر ایک تاریخ رقم کرنے والا ہے۔

بی بی سی کے نامہ نگار کا کہنا ہے کہ اولمپک مشعل کی برازیل میں آمد کے حوالے سے زیادہ گرمجوشی نہیں دکھائی دے رہی کیونکہ ملک کی صدر کو مواخذے کا سامنا ہے۔

صدر جیلما روسیف کے خلاف کارروائی کی وجہ سے غیر یقینی پائی جاتی ہے کہ اولمپک کے وقت ملک کا سربراہ کون ہو گا۔

اس کے علاوہ اس وقت ملک میں بے روزگاری کی شرح بڑھ کر 10 فیصد تک پہنچ گئی ہے کیونکہ مسلسل دو برس سے ملکی معیشت سست روی کا شکار ہے۔

دوسری جانب حقوق انسانی کی تنظیم ایمنسٹی نے ریو کے پسماندہ علاقوں میں پولیس کے ہاتھوں ہلاکتوں پر تشویش کا اظہار کیا ہے۔

تنظیم کے مطابق پولیس نے ان علاقوں میں اب تک 11 افراد کو ہلاک کیا ہے اور گذشتہ برس یہ تعداد 307 تھی۔