سنچورین میں جنوبی افریقہ کی سات وکٹوں سے فتح

سنچورین میں کھیلے جانے والے تیسرے ایک روزہ کرکٹ میچ میں جنوبی افریقہ نے کوئنٹن ڈی کاک اور ہاشم آملہ کی سنچریوں کی بدولت انگلینڈ کو سات وکٹوں سے ہرا دیا۔

کوئنٹن ڈی کاک اور ہاشم عاملہ نے پہلی وکٹ کی شراکت میں 239 رنز بنائے جو جنوبی افریقہ کی فتح کا باعث بنے۔

جنوبی افریقہ کی جانب سے کوئنٹن ڈی کاک نے 16 چوکوں اور چار چوکوں کی مدد سے 135 اور ہاشم آملہ نے 13 چوکوں اور دو چھکوں کی مدد سے 127 رنز بنائے۔

انگلینڈ کی جانب سے کرس جارڈن، معین علی اور عادل رشید نے ایک، ایک کھلاڑی کو آؤٹ کیا۔

اس سے پہلے انگلینڈ نے پہلے بیٹنگ کرتے ہوئے جنوبی افریقہ کو جیتنے کے لیے 319 رنز کا ہدف دیا۔

ڈی کاک نے چار چھکوں کی مدد سے 135 رنز بنائے اور آملہ نے 127 رنز سکور کیے۔

انگلینڈ نے مقررہ 50 اوورں میں آٹھ وکٹوں کے نقصان پر 318 رنز بنائے جس میں نمایاں حصہ جو روٹ کا تھا جنھوں نے دس چوکوں اور پانچ چھکوں کی مدد سے 125 رنز بنائے۔

انگلینڈ کی جانب سے جیسن روئے اور ایلکس ہیلز نے اننگز کا آغاز کیا۔ انگلینڈ کا آغاز اچھا نہ تھا اور صرف 36 رنز کے مجموعی سکور پر اس کی پہلی وکٹ گر گئی۔

ابتدائی نقصان کے بعد ایلکس ہیلز اور جو روٹ نے دوسری وکٹ کی شراکت میں 125 رنز بنائے۔

جنوبی افریقہ کی جانب سے کیگیسو ربادا اور کائلز ایبٹ نے دو، دو اور ڈیوڈ وائز نے ایک کھلاڑی کو آؤٹ کیا۔

پانچ ایک روزہ میچوں کی سیریز میں انگلینڈ کو دو ایک سے برتری حاصل ہے۔

پورٹ الزبتھ میں کھیلے جانے والے دوسرے ایک روزہ میچ میں انگلینڈ نے جنوبی افریقہ کو پانچ وکٹوں سے جبکہ بلوم فاؤنٹین میں کھیلے جانے والے پہلے ایک روزہ میچ میں بھی انگلینڈ نے جنوبی افریقہ کو ڈک ورتھ لیوس کے تحت 39 رنز سے ہرایا تھا۔