سکیورٹی خدشات: آسٹریلیا کی بنگلہ دیش روانگی موخر

سکیورٹی خدشات کی بنا پر آسٹریلوی کرکٹ ٹیم کی دورہ بنگلہ دیش کے لیے روانگی موخر کر دی گئی ہے۔

کرکٹ آسٹریلیا کے مطابق حکومتی ذرائع کا کہنا ہے کہ بنگلہ دیش میں آسٹریلوی کھلاڑیوں کو ممکنہ سکیورٹی خطرات کا سامنا ہو سکتا ہے۔

واضح رہے کہ آسٹریلوی ٹیم 28 ستمبر کو بنگلہ دیش روانہ ہونے والی تھی، تاہم اب نئے سکیورٹی پلان کی تشکیل تک آسٹریلوی ٹیم کی روانگی موخر کر دی گئی ہے۔

دو ٹیسٹ میچوں پر مشتمل سیریز کا آغاز 9 اکتوبر کو چٹاگانگ میں ہونا تھا۔

آسٹریلوی کرکٹ بورڈ کے چیف ایگزیکٹو جیمز سدرلینڈ کا کہنا ہے کہ ’ ہماری خواہش ہے کہ یہ دورہ ہو اور ہم اس کے لیے منصوبہ بندی کر رہے ہیں لیکن ہمارے کھلاڑیوں اور عملے کی حفاظت ہماری اولین ترجیح ہے اور اس پر کسی قسم کا سمجھوتہ نہیں ہوسکتا۔‘

ان کا مزید کہنا تھا کہ ’ ٹیم کی سفری تفصیلات کو حتمی شکل دینے سے پہلے ہم اگلے ہفتے تک سکیورٹی کے حوالے سے معلومات آنے کا انتظار کریں گے۔‘

یاد رہے کہ اس دورے کے لیے آسٹریلیا نے اپنی پندرہ رکنی ٹیم کا اعلان کر دیا ہے جس کے مطابق سٹیو اسمتھ کپتانی کے فرائض سرانجام دیں گے اور ٹیم میں دو نئے کھلاڑیوں بلے باز کیمرون بینکرافٹ اور فاسٹ بالر اینڈریو فیکیٹے کو بھی شامل کیا گیا ہے۔