فیفا کے نئے صدارتی انتخابات آئندہ فروری میں

فٹبال کی عالمی تنظیم فیفا کے نئے صدر کا انتخاب 26 فروری 2016 کو ایک غیر معمولی اجلاس کے دوران کیا جائےگا۔

اس سے قبل 29 مئی کو سیپ بلیٹر فیفا کے صدر کے عہدے پر منتخب ہو ئے تھے لیکن چار دن بعد ہی شروع ہونے والی بد عنوانی کی تحقیقات کے بعد انھوں نے یہ عہدہ چھوڑنے کا اعلان کر دیا تھا۔

فیفا کے نئے صدر کے لیے ہونے والے الیکشن میں حصہ لینے والے امیدواروں کے انتخاب کی حتمی تاریخ 26 اکتوبر ہے۔

عالمی فٹبال کے سربراہان میں سے زیادہ تر نے یورپی فٹبال ایسوسی ایشن یعنی ’یو ایفا‘ کے صدر مائکل پلاٹینی سے اس عہدے کے لیے انتخاب لڑنے کو کہا ہے۔

ابتدائی طور پر خیال کیا جا رہا تھا کہ شاید یہ الیکشن دسمبر میں کروائے جائیں جیسا کے بہت سی علاقائی فٹبال کنفیڈریشن اس کے حق میں تھیں۔

الیکشن کی اس نئی تاریخ کے وقت سیپ بلیٹر کو تقریباً نو ماہ ہو چکے ہوں گے۔

پیر کے رو گذشتہ انتخابات میں سیپ بلیٹر سے ہارنے والے پرنس علی بن الحسین نے پیر کو 79 سالہ بلاٹر سے فوراً عہدہ چھوڑنے کا مطالبہ کیا ہے۔

ان کا کہنا تھا کہ ’صدر بلاٹر کے استعفے کو زیادہ دیر نہیں روکنا چاہیے، انھیں فوراً چلے جانا چاہیے۔‘

علی بن الحسین نے مزید کہا کہ ’الیکشن کے عمل پر کام کرنے اور اس سے قبل اصلاحات پر بات چیت کرنے کے لیے ایک عبوری قیادت مقرر کر لینی چاہیے۔‘