گال ٹیسٹ کا چوتھا دن مکمل، پاکستان کو برتری حاصل
،تصویر کا ذریعہAFP
گال میں کھیلے جا رہے پہلے کرکٹ ٹیسٹ میچ کے چوتھے دن کھیل کے اختتام پر سری لنکا نے اپنی دوسری اننگ میں دو وکٹوں کے نقصان پر 63 رنز بنائے تھے۔ جبکہ اسے پاکستان کی برتری ختم کرنے کے لیے مزید 54 رنز درکار ہیں۔
سری لنکا کی جانب سے آؤٹ ہونے والے کھلاڑیوں میں پہلی اننگ میں سنچری بنانے والے کوشل سلوا اور نصف سنچری سکور کرنے والے کمار سنگاکارا شامل ہیں۔
<link type="page"><caption> میچ کا تفصیلی سکور کارڈ</caption><url href="http://www.bbc.co.uk/sport/cricket/scorecard/90112" platform="highweb"/></link>
اوپنر کرونا رتنے 36 اور دل روون پریرا بنا کوئی رنز بنائے کریز پر موجود ہیں۔
اس سے قبل پاکستانی ٹیم سری لنکا کے 300 رنز کے جواب میں 417 رنز بنا کر آؤٹ ہو گئی تھی۔ اس طرح پاکستان کو 117 رنز کی برتری حاصل ہو گئی تھی۔
پاکستان کی جانب سے آخری آؤٹ ہونے والے کھلاڑی اسد شفیق تھے جو 131 رنز بنا کر آؤٹ ہوئے۔
اس سے قبل گال میں کھیلے جار ہے پہلے کرکٹ ٹیسٹ میچ کے چوتھے دن پاکستانی مڈل آرڈر کے بلے باز ٹیم کو مشکلات سے نکالنے میں کامیاب رہے تھے۔
،تصویر کا ذریعہAFP
پاکستان کے آؤٹ ہونے والے نویں کھلاڑی ذوالفقار بابر تھے جو 56 رنز بنا کر آؤٹ ہوئے۔
اسد شفیق نے ٹیسٹ کرکٹ میں اپنی ساتویں سنچری 208 گیندیں کھیل کر چار چوکوں کی مدد سے مکمل کی جبکہ ذوالفقار بابر نے ٹیسٹ کرکٹ میں اپنی پہلی نصف سنچری بنائی ہے۔
ان دونوں نے نویں وکٹ کے لیے 90 رنز سے زیادہ کی شراکت قائم کی ہے۔
اس سے قبل پہلے سیشن میں اسد شفیق نے سرفراز احمد کے ساتھ مل کر ٹیم کو مشکل حالات سے نکالنے میں اہم کردار ادا کیا۔ ان دونوں نے چھٹی وکٹ کے لیے 139 رنز کی اہم شراکت قائم کی جس کی وجہ سے پاکستان کے فالو آن ہونے کا خطرہ بھی ٹلا۔
اس دوران سرفراز احمد نے ٹیسٹ کرکٹ میں اپنے ایک ہزار رنز بھی مکمل کر لیے لیکن وہ چار رنز کی کمی سے ٹیسٹ کرکٹ میں اپنی چوتھی سنچری نہ بنا سکے اور پرساد کی تیسری وکٹ بنے۔
وہاب ریاض آؤٹ ہونے والے ساتویں پاکستانی بلے باز تھے جنھیں 14 کے انفرادی سکور پر پریرا نے بولڈ کیا جبکہ 23 رنز بنانے والے یاسر شاہ کو آؤٹ کر کے پردیپ نے اپنی دوسری اور ٹیم کے لیے آٹھویں وکٹ لی۔
،تصویر کا ذریعہAFP
جمعے کو کھیل کے تیسرے دن پاکستانی ٹیم ٹاپ آرڈر کے بلے بازوں کی ناکامی کی وجہ سے مشکلات کا شکار ہوگئی تھی اور ایک موقع پر اس کے پانچ کھلاڑی صرف 96 رنز پر آؤٹ ہوگئے تھے۔
ٹاپ آرڈر میں سوائے یونس خان کے کوئی قابلِ ذکر کارکردگی نہیں دکھا سکا تھا۔
یونس خان نے47 رنز بنائے جبکہ اظہر علی، محمد حفیظ اور احمد شہزاد کا سکور تو دوہرے ہندسوں میں بھی داخل نہیں ہو سکا تھا۔
سری لنکا کی جانب سے اب تک دھمیکا پرساد نے تین جبکہ پردیپ اور پریرا نے دو، دو اور ہیراتھ نے ایک وکٹ لی ہے۔
سری لنکا کی ٹیم اس بارش سے متاثرہ میچ میں کوشل سلوا کی عمدہ بلے بازی کی بدولت پہلی اننگز میں 300 رنز بنانے میں کامیاب رہی تھی۔
،تصویر کا ذریعہAFP
سلوا نے ٹیسٹ کرکٹ میں اپنی دوسری اور پاکستان کے خلاف پہلی سنچری بنائی تھی۔
اس ٹیسٹ میچ کے پہلے دن کا کھیل بارش کی وجہ سے نہیں ہو سکا تھا اور دوسرے دن بھی میدان گیلا ہونے کے باعث میچ سوا دو گھنٹے کی تاخیر سے شروع ہوا تھا۔
پاکستان اور سری لنکا کی تین ٹیسٹ میچوں کی یہ سیریز دو سال کے مختصر عرصے میں ان دونوں ٹیموں کے درمیان کھیلی جانے والی چوتھی سیریز ہے۔
پاکستانی کرکٹ ٹیم سنہ 2006 کے بعد سے سری لنکا میں کوئی ٹیسٹ سیریز نہیں جیت پائی ہے۔ آخری بار اس نے انضمام الحق کی قیادت میں دو ٹیسٹ میچوں کی سیریز ایک صفر سے جیتی تھی۔
