آئرلینڈ کو شکست اور ورلڈ کپ میں بھارت بدستور ناقابلِ شکست

کرکٹ کے 11ویں ورلڈ کپ میں منگل کو پول بی کے ایک میچ میں آئرلینڈ نے جیت کے لیے مدمقابل ٹیم بھارت کو 260 رنز کا ہدف دیا جو اس نے صرف دو وکٹوں کے نقصان پر 37ویں اوور میں پورا کر لیا۔

اس طرح بھارت نے پول بی میں پانچ میچ کھیل کر پانچوں میں کامیابی حاصل کر لی ہے۔

بھارت کی جانب سے اوپنر روہت شرما اور شیکھر دھون نے عمدہ بلے بازی کے ذریعے ٹیم کو اچھا آغاز دیا۔ دھون نے 11 چوکوں اور پانچ چھکوں کی مدد سے سینچری مکمل کی۔ آئر لینڈ کے ٹامس نے پہلے اوپنر روہت شرما کو 64 رنز پر آؤٹ کیا اور اس کے بعد دھون کی وکٹ بھی انھوں نے ہی حاصل کی۔

<link type="page"><caption> میچ کا تفصیلی سکور کارڈ</caption><url href="http://www.bbc.co.uk/sport/cricket/scorecard/88579" platform="highweb"/></link>

شیکھر دھون کو میچ کا بہترین کھلاڑی قرار دیا گیا۔ انھوں نے رچرڈ ہیڈلی سے اپنا اعزاز وصول کیا۔

میچ کے اختتام پر وراٹ کوہلی 44 اور اجنکیا رہانے 33 رنز بنا کر کریز پر موجود تھے۔

اس سے قبل آئرلینڈ نے ٹاس جیت کر پہلے بیٹنگ کا فیصلہ پہلے کھیلنے کا فیصلہ کیا اور اس کی پوری ٹیم 49ویں اوور کے اختتام پر 259 رنز بنا کر آؤٹ ہوگئی۔

اوپنر ولیم پورٹ فیلڈ اور پال سٹرلنگ نے 15 اووروں میں 89 رنز کی شراکت قائم کر کے اپنی ٹیم کو عمدہ آغاز فراہم کیا۔ انھوں نے بالترتیب 67 اور 42 رنز بنائے۔

فاسٹ بولروں کی ناکامی کے بعد بھارتی کپتان دھونی نے ایشون کو آزمایا جنھوں نے 15ویں اوور میں سٹرلنگ کو 42 کے سکور پر کیچ کروا کے ٹیم کو پہلی کامیابی دلوائی۔

دو ہی اووروں بعد سریش رائنا نے ایڈ جوائس کو دو رنز پر بولڈ کر دیا۔

آئرش کپتان پوٹرفیلڈ نے نصف سنچری بنائی۔ وہ 67 رنز کی اننگز کھیل کر موہت شرما کا شکار بنے۔ ان کے بعد آنے والے بلےبازوں میں ماسوائے نائل اوبرائن کے اور کوئی بھی جم کر نہ کھیل سکا۔

نائل اوبرائن نے 75 گیندوں پر سات چوکوں اور تین چھکوں کی مدد سے شاندار اننگز کھیلی۔ انھیں محمد شامی کی گیند پر یادو نے کیچ آؤٹ کیا۔

بھارت کی جانب سے محمد شامی تین وکٹوں کے ساتھ نمایاں بولر رہے ۔ایشون نے دو وکٹیں حاصل کیں جبکہ یادو، شرما جڈیجا اور رائنا ایک ایک وکٹ حاصل کرنے میں کامیاب ہوئے۔

آئرلینڈ کے پانچ کھلاڑی رنز میں دوہرا ہندسہ عبور کرنے میں ناکام رہے۔

یہ اس ورلڈ کپ میں پہلا موقع ہے کہ بھارتی ٹیم نیوزی لینڈ میں کوئی میچ کھیل رہی ہے۔ بھارت نے اس ورلڈ کپ کے دوران ہر مخالف ٹیم کو 50 اووروں کے اندر اندر آؤٹ کیا ہے۔

اس میچ کے لیے بھارت نے یو اے ای کے خلاف جیتنے والی ٹیم ہی میدان میں اتاری جبکہ آئرش ٹیم میں ایک تبدیلی کی گئی اور سپنر اینڈی میکبرائڈ کی جگہ فاسٹ بولر سٹورٹ ٹامسن کو جگہ دی گئی۔

بھارت اس پول میں اب تک واحد ناقابلِ شکست ٹیم ہے اور وہ پوائنٹس ٹیبل پر پانچ میچوں میں دس پوائنٹس کے ساتھ سرفہرست ہے۔