محمد عرفان چھ ہفتے کے لیے کرکٹ سے باہر
پاکستان کرکٹ ٹیم کے فاسٹ بولر محمد عرفان ان فٹ ہونے کے سبب سری لنکا کے دورے میں حصہ نہیں لے سکیں گے۔
محمد عرفان جنوبی افریقہ کے خلاف دوسرے ٹی ٹوئنٹی انٹرنیشنل میں بولنگ کرتے ہوئے دوسرے اوور میں گر پڑے تھے اور ہیم سٹرنگ کی تکلیف کے سبب انھیں میدان سے باہر جانا پڑا تھا۔ اسی وجہ سے وہ جنوبی افریقہ کے دورے کے لیے بھی ٹیم میں جگہ نہیں بناسکے تھے۔
پاکستان کرکٹ بورڈ کے ڈائریکٹر انٹرنیشنل کرکٹ انتخاب عالم کے مطابق محمد عرفان کو صحت یاب ہونے میں چار سے چھ ہفتے لگیں گے۔
پاکستان اور سری لنکا کے درمیان سیریز کا آغاز 11 دسمبر کو ٹی ٹوئنٹی میچ سے ہو رہا ہے۔ اس سیریز میں دو ٹی ٹوئنٹی، پانچ ایک روزہ اور تین ٹیسٹ میچ کھیلے جائیں گے۔
محمد عرفان طویل قامت کے سبب کرکٹ میں منفرد حیثیت رکھتے ہیں، تاہم ان کاکریئر فٹنس کے مسائل کا شکار رہا ہے اور ٹیم مینیجمنٹ کو ہمیشہ یہ مشورہ دیا جاتا رہا ہے کہ انھیں احتیاط سے استعمال کیا جائے کیونکہ لمبی بولنگ کر کے وہ ان فٹ ہوجاتے ہیں۔
جنوبی افریقہ کے خلاف متحدہ عرب امارات میں کھیلی گئی سیریز میں محمد عرفان نے تمام نو میچ کھیلے اور مجموعی طور پر 117.3 اوورز کیے۔
انھوں نے دو ٹیسٹ میچز میں سات وکٹیں حاصل کیں جب کہ ون ڈے سیریز میں ان کی وکٹوں کی تعداد نو رہی۔
