کرکٹ ورلڈ کپ 2019: جنوبی افریقہ نے سری لنکا پر نو وکٹوں سے فتح حاصل کر لی
،تصویر کا ذریعہGetty Images
کرکٹ کے 12ویں عالمی کپ کے 35ویں میچ میں جنوبی افریقہ نے سری لنکا کو نو وکٹوں سے شکست دے دی۔
میچ میں کیا ہوا؟
لیڈز میں جنوبی افریقہ کے کپتان فاف ڈو پلیسی نے پہلے بولنگ کا فیصلہ کیا تو کگیسو ربادا نے پہلی ہی گیند پر سری لنکن کپتان کو پویلین لوٹا دیا۔ جنوبی افریقہ کی ٹیم میں فاسٹ بولر ڈوین پریٹوریس کی شمولیت بھی کارآمد ثابت ہوئی جنھوں نے اپنے دس اوورز میں صرف 25 رنز دے کر تین کھلاڑیوں کو پویلیوں کی راہ دکھائی۔ اس سب میں سری لنکا کی بیٹنگ سنبھل نہ پائی اور صرف 203 رنز ہی بنا پائی۔
جنوبی افریقہ کی جانب سے پریٹوریس اور مورس تین تین وکٹوں کے ساتھ نمایاں رہے جبکہ سری لنکا کی جانب سے اوشکا فرنینڈو نے 30 رنز کی اننگز کھیلی۔
204 رنز کے تعاقب میں جنوبی افریقہ نے آغاز سے ہی پر اعتماد بیٹنگ کی اور سری لنکن بولرز کو جمنے نہ دیا۔ کوئنٹن ڈی کاک کے جلدی آؤٹ ہونے کے باوجود فاف ڈو پلیسی کے عمدہ 96 اور ہاشم آملہ کے 80 رنز کی ناقابلِ شکست اننگز نے جنوبی افریقہ کو فتح سے ہمکنار کیا۔ سری لنکا کی جانب سے ایک وکٹ لاستھ ملنگا کے نام رہی۔
،تصویر کا ذریعہGetty Images
میچ کا بہترین کھلاڑی
جنوبی افریقہ نے آج لنگی نگیڈی کی جگہ ڈوین پریٹوریس کو ٹیم میں کھلانے کا فیصلہ کیا جو ان کے ٹاس جیت کر بولنگ کرنے کے ارادے کی طرح درست ثابت ہوا۔
پریٹوریس کی خاص بات انھیں اپنے لمبے قد کی وجہ سے ملنے والا باؤنس تھا۔ ایک موقع پر جب سری لنکا کے 67 رنز پر صرف ایک کھلاڑی آؤٹ تھا تو ایسے میں پریٹوریس نے کسال پریرا، اوشکا فرنینڈو اور کسال مینڈس کو آؤٹ کر کے سری لنکن بیٹنگ کی کمر توڑ دی۔
وہ اپنے دس اوورز میں صرف 25 رنز دے کر تین اہم وکٹیں حاصل کرنے پر مین آف دی میچ قرار پائے۔
،تصویر کا ذریعہGetty Images
میچ کا بہترین بلے باز
جنوبی افریقہ کے کپتان فاف ڈوپلیسی کے بارے میں انڈیا کے کپتان وراٹ کوہلی نے ٹورنامنٹ سے پہلے کہا تھا کہ اگر ایک کھلاڑی وہ کسی اور ٹیم سے لے سکتے تو وہ فاف ڈو پلیسی ہوتے۔
End of سب سے زیادہ پڑھی جانے والی
لیکن ڈوپلیسی نے پورے ٹورنامنٹ میں وہ کارکردگی نہیں دکھائی جس کی ان سے امید کی جا رہی تھی۔ شاید اس کی ایک وجہ ان پر موجود کپتانی کا بوجھ بھی تھا۔ البتہ آج وہ ایک مختلف رنگ میں نظر آئے اور خوبصورت انداز میں بلے بازی کرتے ہوئے 96 رنز کی ناقابلِ شکست اننگز کھیلی۔ ان کی اننگز میں 10 چوکے اور ایک چھکا بھی شامل تھا۔
،تصویر کا ذریعہGetty Images
اس ٹورنامنٹ میں دونوں ٹیموں کی کارکردگی
جنوبی افریقہ کی ٹیم پاکستان سے شکست کے بعد اس ورلڈ کپ سے باہر ہو چکی ہے، جبکہ سری لنکا کی ٹیم کے نے اپنے حالیہ میچ میں میزبان انگلینڈ کو ہرا کر سیمی فائنل تک رسائی کی امید برقرار رکھی تھی۔
البتہ آج کی شکست کے بعد سری لنکا کی سیمی فائنل تک رسائی مشکل دکھائی دے رہی ہے۔ سرری لنکا کو نہ اپنے اگلے دونوں میچ جیتنے ہوں گے بلکہ باقی ٹیموں کی ناکامیوں کی امید بھی کرنی ہو گی۔
یہ بھی پڑھیے
،تصویر کا ذریعہGetty Images
سری لنکا کی ناقص بلے بازی
سری لنکا کی ٹیم کے پاس میزبان انگلینڈ کو شکست دینے کے بعد اس سیمی فائنل تک رسائی کو یقینی بنانے کا یہ سنہری موقع تھا۔ لیکن سری لنکن بلے بازوں نے انتہائی غیر زمے دارانہ سٹروکس کھیلے اور ایک اچھا ٹوٹل بنانے میں ناکام رہے۔
سابق کپتان اینجلو میتھیوز کی شاٹ میچ کی صورتحال کے حصاب سے انتہائی ناقص تھی۔ انھوں نے کرس مارس کو دو چوکے مارنے کے بعد دوبارہ قدموں کا استعمال کیا اور گیند ان کے بلے کا اندرونی کنارا لیتی ہوئی وکٹوں سے جا ٹکرائی۔
