آپ اس وقت اس ویب سائٹ کا ٹیکسٹ پر مبنی ورژن دیکھ رہے ہیں جو کم ڈیٹا استعمال کرتا ہے۔ مرکزی ویب سائٹ جہاں تمام تصاویر اور ویڈیوز موجود ہیں دیکھیے
پاکستان بمقابلہ نیوزی لینڈ: پہلے دن کے کھیل کے بعد پاکستان کا پلڑا بھاری، کیویز کے سات آؤٹ
متحدہ عرب امارات میں پاکستان اور نیوزی لینڈ کے مابین تین ٹیسٹ میچوں کی سیریز کا تیسرا اور آخری میچ ابوظہبی میں کھیلا جا رہا ہے۔
ٹیسٹ میچ کے پہلے روز کے اختتام تک نیوزی لینڈ کے ٹیم نے سات وکٹوں کے نقصان پر 229 رنز بنائے اور اس وقت کریز پر بی جے واٹلنگ 42 رنز پر جبکہ اپنا پہلا میچ کھیلنے والے ولیم سومرویل 12 رنز بنا کر موجود ہیں۔
آج صبح جب میچ کا آغاز ہوا تو نیوزی لینڈ کے کپتان کین ولیمسن نے ٹاس جیت کر پہلے بیٹنگ کا فیصلہ کیا۔
اس فیصلے کے بعد پاکستان کو پہلی کامیابی جلد ہی مل گئی جب اپنا پہلا ٹیسٹ میچ کھیلنے والے فاسٹ بولر شاہین شاہ آفریدی نے لیتھم کو ایل بی ڈبلیو آؤٹ کر دیا۔ انھوں نے صرف چار رنز بنائے۔
یہ شاہین شاہ آفریدی کی پہلی ٹیسٹ وکٹ تھی۔ یاسر شاہ نے جیت راول کو 35 کے انفرادی سکور پر ایل بی ڈبلیو آؤٹ کرکے پاکستان کو دوسری کامیابی دلائی۔
یاسرشاہ کی اگلی ہی بال پر روس ٹیلر بغیر کوئی رن بنائے بولڈ ہوگئے۔
کھانے کے وقفے سے چند لمحے قبل یاسر شاہ نے ہیری نکولس کو بھی بولڈ کر دیا، وہ صرف ایک رن بنا سکے۔
End of سب سے زیادہ پڑھی جانے والی
دن کے دوسرے سیشن میں ولیمسن اور واٹلنگ نے زبردست شراکت قائم کی اور بغیر آؤٹ ہوئے وہ سیشن نکال دیا۔
چائے کے وقفے کے بعد کھیل دوبارہ شروع ہوا تو کپتان کین ولیمسن اور بی جے واٹلنگ نے اپنی شراکت کی سنچری مکمل کرنے میں کامیاب ہو گئے لیکن کیویز کو اس کے فوراً بعد نقصان اٹھانا پڑا جب 176 کے مجموعی سکور پر حسن علی نے ولیمسن کو آؤٹ کر دیا جو 89 رنز بنا سکے۔
ولیمسن کے آؤٹ ہونے کے بعد پاکستان میں کھیل پر اپنی گرفت مضبوط کرنی شروع کر دی اور پہلے کولن ڈی گرانڈہوم کو 20 رنز پر اور اس کے بعد ٹم ساؤتھی دو رنز پر آؤٹ ہو گئے۔
دونوں کھلاڑیوں کو آف سپنر بلال آصف نے آؤٹ کیا۔
خیال رہے کہ پاکستانی فاسٹ بولر محمد عباس ان فٹ ہونے کے باعث ٹیم کا حصہ نہیں ہیں اور ان کی جگہ شاہین شاہ آفریدی کو ٹیم میں شامل کیا گیا ہے۔ نیوزی لینڈ کی جانب سے ول سمرولے اپنا پہلا ٹیسٹ میچ کھیل رہے ہیں۔
تین ٹیسٹ میچوں کی سیریز 1-1 سے برابر ہے۔
ابوظہبی میں ہی کھیلے گئے پہلے ٹیسٹ میچ میں نیوزی لینڈ نے پاکستان کو چار رنز سے شکست دی تھی جبکہ دبئی میں کھیلے گئے دوسرے ٹیسٹ میچ میں پاکستان نے ایک اننگز اور 16 رنز سے زیر کر کے سیریز برابر کر دی تھی۔
ٹیسٹ سیریز سے قبل دونوں ٹیموں کے درمیان تین ٹی 20 اور تین ہی ایک روزہ میچوں کی سیریز بھی کھیلی گئی تھی جس میں پاکستان نے نیوزی لینڈ کو ٹی 20 میچوں کی سیریز میں تین صفر سے شکست دی جبکہ ون ڈے سیریز ایک، ایک میچ سے برابر رہی تھی۔
