کرکٹ: پاکستان کی لارڈز میں شاندار فتح، انگلینڈ کو نو وکٹوں سے شکست
،تصویر کا ذریعہGetty Images
پاکستان اور انگلینڈ کے درمیان لارڈز میں ہونے والے پہلے ٹیسٹ میچ کے چوتھے دن پاکستان نے انگلینڈ کو نو وکٹوں سے شکست دے دی ہے۔
انگلینڈ کی ٹیم اپنی دوسری اننگز میں 242 رنز بنا کر آؤٹ ہو گئی تھی اور پاکستان کو اس میچ میں کامیابی کے لیے 64 رنز کا ہدف ملا۔ پاکستان نے یہ ہدف باآسانی صرف ایک وکٹ کے نقصان پر حاصل کر لیا۔
یہ 1995 کے بعد پہلی مرتبہ ہوا ہے کہ انگلینڈ نے اپنے ملک میں گرمیوں میں کھیل کے دوران پہلا ہی ٹیسٹ ہارا ہو۔
،تصویر کا ذریعہGetty Images
پاکستان کے آؤٹ ہونے والے واحد بلے باز اظہر علی تھے جو کہ 12 کے مجموعی سکور پر جیمز اینڈرسن کے ہاتھوں بولڈ ہوگئے۔ تاہم اس کے بعد حارث سہیل اور امام الحق نے بااعتماد انداز میں پاکستان کے لیے ہدف مکمل کر لیا۔
اس سے قبل چوتھے دن کے آغاز پر ہی انگلینڈ اپنے گذشتہ شب کے سکور میں زیادہ اضافہ نہ کر سکا اور اس کی چار وکٹیں یکے بعد دیگرے گر گئیں۔
پاکستان کی جانب سے دوسری اننگز میں محمد عامر اور محمد عباس نے چار چار وکٹیں حاصل کیں جبکہ شاداب خان نے دو کھلاڑیوں کو آؤٹ کیا۔
End of سب سے زیادہ پڑھی جانے والی
انگلینڈ کے کل کے ناٹ آؤٹ بلے باز جوس بٹلر کھیل شروع ہونے کے آغاز میں ہی محمد عباس کا شکار بن گئے۔ اور اگلے ہی اوور میں محمد عامر نے مارک وڈ کو سرفراز کے ہاتھوں کیچ آوٹ کروایا۔
اس کے بعد محمد عباس نے سٹورٹ براڈ کو صفر کے سکور پر آؤٹ کر دیا۔ انگلینڈ کی آخری وکٹ محمد عامر نے حاصل کی جب انھوں نے ڈوم بیس کو بولڈ کر دیا۔
گذشتہ شب جوس بٹلر اور ڈوم بیس نے ساتویں وکٹ کی شراکت میں 126 قیمتی رنز جوڑے۔ جب یہ دونوں بلےباز کریز پر آئے تو صرف 110 کے سکور پر انگلینڈ کی چھ وکٹیں گر چکی تھیں اور بظاہر اس پر اننگز کی شکست کے خطرے منڈلا رہے تھے۔
لیکن ان دونوں کھلاڑیوں نے پاکستانی فاسٹ بولروں اور شاداب خان کو بہت عمدگی سے کھیلا اور میچ تیسرے روز ختم کرنے کی امید توڑ دی۔
یاد رہے کہ بابر اعظم کے زخمی ہونے کی وجہ سے پاکستان کے پاس اس میچ میں ایک وکٹ کم ہوگی۔
،تصویر کا ذریعہGetty Images
میچ کے دوسرے روز بابر اعظم 68 کے انفرادی سکور پر بین سٹوکس کے ایک باؤنسر سے بچنے کی کوشش میں زخمی ہو کر اپنی بیٹنگ جاری نہ رکھ سکے اور انھیں میدان سے باہر جانا پڑا۔ پاکستانی ٹیم کے فزیوتھیراپسٹ کلف ڈیکن نے بعد میں بتایا کہ 'بدقسمتی سے ایکسرے میں ان کی بائیں کلائی میں فریکچر کی تصدیق ہو گئی۔' بابر اعظم انگلینڈ کے خلاف بقیہ سیریز نہیں کھیل سکیں گے۔
پاکستان کی جانب سے پہلی اننگز میں ٹاپ سکورر بھی بابر ہی رہے تھے۔ ان کے علاوہ پاکستان کے ٹاپ آڈر نے اچھی کارکردگی دیکھائی۔ اظہر علی 50، اسد شفیق 59، اور شاداب خان نے 52 رنز بنائے۔
