جو کچھ ہوا انتہائی تکلیف دہ تھا: مصباح الحق

پاکستان اور اسلام آباد یونائٹڈ کے کپتان مصباح الحق کا کہنا ہے کہ دو کرکٹرز کی معطلی کے بعد پاکستانی کرکٹرز کو زیادہ ذمہ داری کا مظاہرہ کرنا ہوگا۔

مصباح الحق نے اتوار کو بی بی سی اردو کو خصوصی انٹرویو میں کہا کہ فی الحال یہ کہنا بہت مشکل ہے کہ ان دو کرکٹرز کی معطلی کے واقعے کے آنے والے دنوں میں کیا اثرات مرتب ہوں گے لیکن جو کچھ بھی ہوا ان کے لیے انتہائی تکلیف دہ اور مایوس کن تھا۔

* ’مصباح نے مشکل وقت میں حوصلہ دیا‘

مصباح الحق نے کہا کہ وہ کوشش کررہے ہیں کہ اس واقعے کے اثرات سے نکلتے ہوئے آگے بڑھنے کی کوشش کی جائے۔

مصباح الحق نے کہا کہ سنہ 2010 میں سپاٹ فکسنگ سکینڈل کے بعد اسی بات کی کوشش کی جاتی رہی کہ پاکستان کی کرکٹ دوبارہ اس طرح کی صورتحال سے دوبارہ دوچار نہ ہو لیکن اب یہ واقعہ رونما ہوگیا لہٰذا اب ہمیں ایک بار پھر محتاط ہونا پڑے گا اور کرکٹ پر بہت زیادہ توجہ دینی ہوگی۔

مصباح الحق نے پاکستان کرکٹ بورڈ اور آئی سی سی کو اپنے اقدامات میں مزید سختی لانی ہوگی اور ساتھ ساتھ کرکٹرز کو کرپشن کے بارے میں مزید تعلیم اور معلومات فراہم کرکے اس کے خطرات سے آگاہ کرنا ہوگا۔