تہران: فٹبال میچ میں ایران کی فتح، شائقین کے محرم کی مناسبت سے نعرے

تہران میں ایران اور جنوبی کوریا کے مابین ورلڈ کپ کوالیفائنگ میچ دیکھنے کے لیے آنے والے شائقین کو محرم الحرام کی مناسبت سے نعرے بلند کرنے کا کہا گیا۔

اس میچ میں ایران نے جنوبی کوریا کو صفر کے مقابلے میں ایک گول سے شکست دے دی۔

تہران میں حکام نے شائقین سے کہا کہ وہ میچ کے دوران فٹبال سے متعلق نعرے بازی کرنے کی بجائے محرم الحرام کے حوالےسے نعرے لگائیں۔

جنوبی کوریا کے کھلاڑی بھی میچ کے دوران ایرانی حریفوں سے یکجہتی کے اظہار کے طور پر بازو پر کالی پٹیاں پہنی۔

تہران کے آزادی سٹیڈیم میں کچھ حصے ماتمی شائقین کے لیے مختص کر دیے گئے تھے۔

ایران کے کئی مذہبی رہنماؤں نے عاشورہ سے ایک روز پہلے میچ نہ کھیلنے کا مشورہ دیا تھا۔

ایرانی حکام نے جنوبی کوریا کے حق میں دستبردار ہونے کی بجائے میچ کھیلنے کا فیصلہ کیا تاہم شائقین کو ہدایت کی گئی کہ وہ فٹبال سے متعلق نعرے بازی کرتے ہوئے محرم الحرام کی مناسب سے نعرے بلند کریں۔

اس سے پہلے ایرانی حکام نے جنوبی کوریا کے کپتان کے اس جملے پر شکایت کی تھی جس میں اس نے تہران کو ایک بڑی جیل قرار دیا تھا۔

جنوبی کوریا کے کپتان کی سنگ یونگ نے کہا تھا کہ جب ان کی ٹیم تہران کے ایئرپورٹ پر اتری تو کچھ تماشائیوں نے کوریائی ٹیم پر بوتلیں اور دوسری اشیا پھینکی جو کھلاڑیوں کو لگیں۔

جنوبی کوریا کے کپتان کی سنگ یونگ انگلش پریمئیر لیگ کے کلب سوانزی کی طرف سے کھیلتے ہیں۔

جنوبی کوریا کی ٹیم جب تہران کےایئرپورٹ پر پہنچی تو انھوں نے آلودگی سے بچنے کے لیے ماسک پہن رکھے تھے۔