مائیکروسافٹ کی انتظامیہ یاہو کو خرید کر گوگل کا مقابلہ چاہتی تھی

مائیکرو سافٹ نے یاہو کو خریدنے کی پیش کش تین ماہ قبل کی تھی۔

مائیکرو سافٹ کے چیف ایگزیکٹو سٹیو بالمر نے سنیچر کے روز یاہو کے چیف ایگزیکٹو جیری ینگ کو ایک خط کے ذریعے بولی واپس لے لی۔

مسٹر سٹیو بالمر کے مطابق مائیکرو سافٹ نے اپنی بولی ابتدائی سطح چوالیس اعشاریہ چھ ارب ڈالر سے بڑھا کر سینتالیس اعشاریہ پانچ ارب ڈالر کر دی تھی لیکن یاہو کی انتظامیہ کمپنی کو تریپن ارب ڈالر سے کم پر بیچنے پر راضی نہیں تھی۔ انہوں نے کہا کہ مائیکرو سافٹ یاہو کو اس قیمت پر خریدنے کو تیار نہیں تھا۔

مائیکروسافٹ کی انتظامیہ یاہو کو خرید کر گوگل کا مقابلہ چاہتی تھی جس کی انٹر نیٹ ایڈورٹائزنگ پر اجارہ داری ہے۔

سن دو ہزار سال کے دوران انٹرنیٹ ایڈورٹائزنگ کا کل حجم چالیس ارب ڈالر رہا جو سن دو ہزار دس تک دوگنا ہو کر اسی ارب ڈالر تک پہنچ جانے کی توقع ہے۔

اپنے خط میں مائیکرو سافٹ کے چیف ایگزیکٹو نے کہا ہے کہ وہ اب بھی یہ سمجھتے ہیں کہ ان کی پیش کش مائیکرو سافٹ، یاہو اور انٹرنیٹ مارکیٹ کے لیے فائدے مند ہے۔

’اپنی بولی میں پانچ ارب ڈالر اضافے سمیت ہماری تمام تر کوششوں کے باجود یاہو کی انتظامیہ نے ہماری پیش کش کا مثبت جواب نہیں دیا۔‘