بی بی سی اور یاہُو کے ماہرین رہنمائی کے لیے موجود ہوں گے

’بی بی سی یاہُو ہیک ڈے‘ کے عنوان سے ہونے والے اس اجتماع کا مقصد ویب ڈیزائنروں کو یہ دکھانا ہے کہ یہ دونوں ادارے جو ڈیٹا فیڈز پیدا کرتے ہیں ان سے کس طرح زیادہ سے زیادہ مستفید ہوا جا سکتا ہے۔

سنیچر اور اتوار کو شرکاء کو ان اداروں کے زیر استعمال ٹیکنالوجی کو ہر طرح سے جانچنے کا موقع دیا جائے گا تا کہ یہ دیکھا جا سکے کہ وہ اس میں کیا جدت پیدا کر سکتے ہیں۔

اس دوران بی بی سی اور یاہُو کے ماہرین بھی شرکاء کی رہنمائی کے لیے موجود ہوں گے۔

کئی دیگر اداروں کی طرح اب بی بی سی اور یاہُو جو کمپوٹر ڈیٹا پیدا کر رہے ہیں وہ کئی ویب ڈیزائنروں کے لیے دلچسپی کا سامان ہے کیونکہ وہ اسے نئے سوفٹ وئر بنانے کے لیے استعمال کر سکتے ہیں۔

بی بی سی جو ڈیٹا فیڈز اور انٹرفیس پیدا کرتا ہے ان کے ذریعے بی بی سی کی ویب سائٹ استعمال کرنے والے صارفین کومختلف ٹی وی چینلوں پر آنے والے پرگراموں کی فہرستوں، تازہ ترین خبروں اور دنیا کے مختلف حصوں میں موسم کے حال تک رسائی ملتی ہے۔

بی بی سی کے ویب ڈویلپمنٹ کے شعبہ کے میٹ کیشمور کا اس بارے میں کہنا تھا کہ ’ اس قسم کی کانفرنسوں میں ویب ڈیزائنرز کو اندازہ ہوتا ہے کہ وہ بی بی سی کی ویب سائٹ پر لگائے جانے والے مواد کو مزید کیسے پھیلا سکتے ہیں اور زیادہ سے زیادہ لوگوں تک اس کی رسائی ممکن بنا سکتے ہیں۔‘

اسی طرح یاہُو کے چاڈ ڈکرسن کا کہنا تھا کہ ’اس سے یاہُو اور بی بی سی جیسے ادروں کو یہ جاننے کا موقع ملتا ہے کہ وہ اپنےصارفین کے علاوہ ویب سائٹس کے دیگر ناظرین کو کیا سہولتیں فراہم کر رہے ہیں۔‘

مسٹر ڈکرسن نے مزید کہا کہ ’جب بھی ویب ڈویلپرز کو آزادنہ ہیکنگ کے اس قسم کے مواقع دیے جاتے ہیں تو ہوتا یہ ہے کہ یہ لوگ ہیکنگ کے بارے میں آپ کو نت نئی معلومات دیتے ہیں۔‘

میٹ کیشمور نے شرکاء سے کہا کہ اگرچہ نئے سوفٹ وئر بنانے کے لیے ان کی حوصلہ افزائی کی جائے گی لیکن وہ یہ دباؤ محسوس نہ کریں کہ ورکشاپ کے اختتام پر انہیں ایک نیا سوفٹ وئر ضرور بنانا ہے۔ اگرچہ اختتام پر بہترین ہیکر کو انعام بھی دیا جائے گا لیکن اس کا مقصد کوڈنگ کی مہارت میں شیخی بگھارنا نہیں ہے۔

’ہم چاہتے ہیں کہ آپ یہاں ہیکنگ کو بطور تفریح لیں۔‘