موٹاپے کی وجہ صرف خوراک اور کاہلی نہیں ہوتی

اس تحقیق کے دوران انہیں معلوم ہوا کہ لوگوں میں دو طرح کی چکنائی یا فیٹس پائے جاتے ہیں، جن کا تعلق جینز سے ہوتا ہے ان میں موٹا ہونے کا ستر فیصد امکان زیادہ ہوتا ہے جب کے دوسری قسم کے لوگوں میں یہ کم ہوتا ہے اوران کا اوسطً وزن، تین کلو کم ہوتا ہے۔

برطانیہ میں اوکسفورڈ یونیورسٹی کے میڈیکل سکول میں ہونا والی اس تحقیق میں چالیس ہزار افراد سے حاصل ہونا والے ’ڈیٹا‘ کا مشاہدہ کیا گیا۔

سائنسدانوں نے اس تحقیق کے بعد یہ تجویز کیا کہ موٹاپا کم کرنے کے لیے زندگی کے طور طریقے بدلنا بہت ضروری ہوتا ہے لیکن بعض لوگوں کو اپنا وزن کم کرنے کے لیے بہت کوشش کرنی پڑتی ہے۔

سائنسدانوں کا کہنا ہے کہ اس تحقیق سے موٹاپے کوسمجھنے میں مدد ملےگی اور اس سے بچاؤ کے بہتر طریقے بھی اپنائے جا سکیں گے۔

جن لوگوں میں ’ٹائپ ٹو‘ ذیابیطس پائی جاتی ہے ان میں موٹاپے پر مائل کرنے والے جینز ہوتے ہیں۔

میڈیکل سکول کے پروفیسر اینڈریو ہیٹرسلی کی تحقیق سے یہ واضح ہوتا ہے کہ کیوں دو مختلف آدمیوں کا وزن ایک طرح کی خوراک کھا کر اور ایک ہی طرح کی ورزش کرکے مختلف ہوتا ہے۔

انہوں نے کہا کہ عام طور پر یہ کہا جاتا ہے کہ اگر آپ کا وزن زیادہ ہے تو اس کا تعلق زیادہ کھانے اور کاہلی سے ہے جس کے آپ قصور وار ہیں۔

اس تحقیق سے یہ ثابت ہوتا ہے کہ اس میں کچھ عمل دخل جینز کا بھی ہوتا ہے۔

کیمبرج یونیورسٹی کے کلینکل بائیو کیمسٹری کے ڈپارٹمنٹ کی ڈاکٹر صدف فاروقی نے کہا کہ یہ تحقیق بہت اہم ہے کیوں اس سے پہلی دفعہ موٹاپے اور انسانی جینز کے درمیان تعلق کا پتہ چلا ہے۔