 | | | ماہرین کے مطابق دستاویزات حساس نوعیت کے تھے |
امریکی حکومت نے اپنی ایک ویب سائٹ بند کردی ہے جس پر ایسے دستاویزات شائع کیے گئے تھے جو سن 2003 میں عراق پر حملوں کے بعد حاصل کیے گئے تھے۔ اخبار نیویارک ٹائمز کے مطابق ہتھیاروں کے ماہرین نے شکایت کی تھی کہ ان دستاویزات میں ایٹمی بم بنانے کے طریقے بتائے گئے تھے۔ امریکہ نے یہ ویب سائٹ – عراقی فریڈم ڈاکومنٹ پورٹل – اس امید میں تیار کی تھی کہ اس پر ایسے دستاویزات شائع کیے جائیں جو صدام حسین کے ہتھیاروں کے پروگرام کے بارے میں کچھ معلومات فراہم کرسکیں۔ امریکہ کے قومی انٹیلیجنس کے ایک ترجمان نے بتایا کہ اس ویب سائٹ کو پھر سے شائع کرنے سے قبل اس پر نظرثانی کی جائے گی۔ عراقی فریڈم ڈاکومنٹ پورٹل مارچ میں ریپبلیکن اراکین کانگریس کے دباؤ میں شائع کی گئی تھی جن کا الزام تھا کہ انٹیلیجنس کے ماہرین صدام حسین کے دور کے دستاویزات کا مطالعہ کرنے میں کافی وقت لگارہے ہیں۔ حکمران جماعت سے تعلق رکھنے والے ان اراکین کانگریس کا خیال تھا کہ عوام کی جانب سے مدد ملنے پر ان دستاویزات کے مواد کے بارے میں مزید معلومات حاصل ہوسکے گی۔ گزشتہ چند ہفتوں میں اس ویب سائٹ پر ایسے دستاویزات شائع ہوئے جن میں 1991 کی پہلی عراق جنگ سے قبل عراق میں ایٹم بم بنانے کی خفیہ تحقیق کی تفصیلات تھیں۔ اخبار نیویارک ٹائمز کے مطابق ان دستاویزات میں ایٹم بنانے کے تابکاری مواد اور ان کے استعمال کی تفصیلات موجود تھیں۔ ایک سفیر کا کہنا تھا کہ یہ دستاویزات ایسے تھے جیسے کھانا پکانے کی کوئی کتاب ہو۔ ایٹمی ہتھیاروں کے ماہرین پیٹر زِمرمن نے اپنا تبصرہ کرتے ہوئے بتایا کہ ان دستاویزات میں ’بلاشبہ خفیہ معلومات تھیں جو کہ کافی حساس’ تھیں۔
| 
سٹیم سیل ریسرچ پر پابندی’ختم‘
