دو لاکھ ویب سائٹیں بچوں سے جنسی تجارت کراکر پیسہ کماتی ہیں

فائنینشیل کولیشن اگینسٹ چائلڈ پورنوگرافی یعنی بچوں سے جنسی زیادتی کے خلاف مالیاتی اتحاد نامی اس کوشش کے تحت دنیا کے اٹھارہ بڑے تجارتی ادارے اس مہم میں شامل ہیں۔

اس مہم میں شامل ہونے والوں میں بینک آف امریکہ، امریکن ایکسپریس، ماسٹر کارڈ، امریکہ آن لائن، یاہو اور مائیکروسافٹ جیسے بڑے تجارتی اداروں کے نام اہم ہیں۔

اس اتحاد میں شریک یہ ادارے ان ویب سائیٹوں کے بارے میں معلومات کا تبادلہ کریں گے جو انٹرنیٹ کا فائدہ اٹھاکر بچوں کا جنسی استحصال کرتے ہیں اور پیسہ کماتے ہیں۔

یہ ادارے ان ویب سائیٹوں کی شناخت کرنے کے بعد ان کی مالی فراہمی بند کردیں گے۔ امید کی جارہی ہے کہ دو سال کے اندر اس کوشش کے تحت کوئی بھی شخص ویب سائٹوں کے ذریعے بچوں سے متعلق فحش مواد کی تجارت نہیں کرسکے گا۔

اس اتحاد میں چند دیگر بڑے نام یہ ہیں: چیز گروپ، سٹی گروپ، ای۔گولڈ، پے پال، ویزہ، فرسٹ ڈیٹا کارپوریشن، بینک کارڈ، اسٹینڈرڈ چارٹرڈ، ویلز فارگو بینک، وغیرہ۔ اس مہم میں بچوں کی فلاح و بہبود کے کچھ عالمی ادارے بھی حمایت کریں گے۔

ایک اندازے کے مطابق لگ بھگ دو لاکھ ویب سائٹیں بچوں سے جنسی زیادتی کی تجارت میں سرگرم ہیں۔

لاپتہ اور زیادتی کا شکار ہونے والے بچوں کے عالمی ادارے کا کہنا ہے کہ قانونی ادارے پوری دنیا میں اس تجارت کو روکنے کی کوشش میں ہیں لیکن یہ ضروری ہے کہ ایسی ویب سائیٹوں کی مالی فراہمی ناکام بنائی جائے۔