وہیل مچھلی کو بچانے کی کوششیں کی جا رہی ہیں

حکام کو تشویش ہے کہ کہیں یہ مچھلی ہلاک نہ ہو جائے۔

اس مچھلی کو صبح ساڑھے آٹھ بجے آفس جاتے ہوئے ایک مسافر نے ٹرین سے دیکھا اور اس نے حکام کو اس کے متعلق فوراً خبردار کیا۔ اس نے کہا کہ شاید وہ خواب دیکھ رہا ہے لیکن بقول اس کے اسے ایک وہیل ہی نظر آئی تھی۔

پھر کیا تھا برطانوی سمندری وسائل کا محکمہ فوراً حرکت میں آ گیا اور اسی وقت سے مچھلی کو بچانے کی کوششوں میں مصروف ہو گیا۔

یہ مچھلی ویسٹ منسٹر میں موجود برطانوی پارلیمنٹ کے قریبی علاقے سے گزر کر کنارے کی طرف آگئی اور حکام اسے بچا کر گہرے پانی میں لے جانے کی کوشش کر رہے ہیں کیوں کہ انہیں خدشہ ہے کہ مزید تاخیر اس کی موت کا سبب بن سکتی ہے۔

یہ پہلا موقع ہے جب دریائے ٹیمز میں ایک وہیل کو دیکھا گیا ہے۔

آخری اطلاعات تک مذکورہ محکمے کے اہلکار وہیل کو سمندر میں لے جانے کی کوشش کر رہے تھے۔