 |  کچھووں کی واپسی سے ان کی نسل کی افزائش کی امید بندھی |
گزشتہ دسمبر سونامی سے سری لنکا کے ساحلوں پر کچھووں کے پسندیدہ اور محفوظ قرار دیے گئے مقامات تباہ ہو گئے تھے۔ چند ہی منٹوں میں کچھووں کے ہزاروں انڈے سمندر میں بہہ گئے تھے اور اب ماہرین کچھووں کی ناپید ہوتی ہوئی اقسام کے لیے پریشان تھے۔ لیکن تازہ ترین سرکاری رپورٹوں کے مطابق سری لنکا کے ساحلوں پر سمندری کھچووں کو انڈے دیتے ہوئے دیکھا گیا ہے۔ امید کی جا رہی ہے کہ یہ رجحان جاری رہے گا۔ |  کچھووں کا گوشت بھی کھایا جاتا ہے |
کچھووں کا گوشت بھی کھایا جاتا ہے
سری لنکا میں جنگلی حیات کے تحفظ کے ادارے کے ناظم اعلیٰ دیانندا کاریاوسم نے کہا کہ ’خوش قسمتی سے دسمبر کچھووں کے ملنے کا موسم نہیں تھا جس سے سمندری کچھووں کے ہزاروں بچ گئے‘۔ انہوں نے کہا کہ اب اصل کام بچے نکلنے تک ان انڈوں کی حفاظت کرنا ہے۔ سری لنکا میں کچھووں کی پانچ اقسام پائی جاتی ہیں جو سبھی جانوروں کی نایاب اقسام میں شامل ہیں۔ سری لنکا میں کچھووں کی آبادی پہلے ہی آلودگی، مونگوں کی تباہی اور ملاپ کے لیے ان کے پسندیدہ علاقوں میں مداخلت سے کم ہو رہی ہے۔ اس کے علاوہ کچھووں کا گوشت اور ان کے انڈے بھی بعض علاقوں میں شوق سے کھائے جاتے ہیں۔ حکام کا کہنا ہے حالیہ مہینوں میں کچھووں کے ملاپ والے علاقوں سے سونامی کے بعد جمع ہونے والا ملبہ ہٹایا گیا ہے تاکہ کچھوے واپس آ کر انڈے دے سکیں ۔ | 
یہ صفحہ دوست کو ای میل کیجیئے
پرِنٹ کریں
