 |  سیارہ زہرہ سیاہ دھبہ بن کر سورج کے سامنے گردش کر رہا ہے |
ہمارے نظام شمسی کا سیارہ زہرہ ایک سو بائیس برس بعد اپنے مدار میں سورج اور زمین کے درمیان سے گزر گیا ہے۔ اس سے قبل یہ نظارہ اٹھارہ سو بیاسی میں دیکھا گیا تھا۔ زہرہ کا یہ گزر منگل کو گرینچ وقت کے مطابق صبح پانچ بجکر بیس منٹ پر شروع ہوا اور ایک سیاہ دائرے کی شکل میں چمکتے سورج پر نظر آیا۔ زہرہ اپنے مدار کے اس حصہ میں تقریباً چھ گھنٹے تک رہا۔ ماہرین نے لوگوں کو خبردار کیا تھا کہ وہ بغیر احتیاطی تدبیر کے اس وقت سورج کی طرف نہ دیکھیں۔ اس موقع پر دنیا بھر میں کئی ویب سائٹس نے اس منظر کو دیکھانے کا اہتمام کیا تھا۔ جب سے دوبین وجود میں آئی ہے زمین اور سورج کے درمیان سے زہرہ کا گزر صرف چھ بار ہوا ہے۔ یہ ساتواں واقعہ تھا۔ اب دوہزار بارہ اور اس کے بعد دو ہزار ایک سو سترہ میں ایسا ہوگا۔ زہرہ کو سورج کے سامنے دیکھنے کا محفوظ طریقہ پہلا طریقہ:
ایک گتے میں دوبین کے آنکھوں والے حصہ کے سائز کے دو سوراخ کریں اور گتے کو تصویر میں دکھائے گئے طریقے سے دوبین پر چڑھا دیں۔ دوربین کی ایک نالی (عدسہ) پر کیپ چڑھا کر اسے بند کر دیں۔ دوربین کو کمر کی اونچائی پر رکھ کر دوسری نالی سے سورج کا عکس نیچے رکھے ہوئے سفید رنگ کے گتے پر ڈالیں۔ دوبین کو اس وقت تک حرکت دیں جب تک اس کا عکس واضح نہ ہوجائے۔ دوسرا طریقہ:
گتہ میں سوئی سے باریک سوراخ کریں۔ گتے کے ایک اور ٹکڑے پر سورج کا عکس ڈالیں۔ سوراخ والے گتے کو اس وقت تک حرکت دیں جب تک سورج کی شعاعیں ایک صاف عکس کی شکل میں نیچے والے گتے پر نہ پڑنے لگیں۔ خبردار:
سورج کی طرف ننگی آنکھ، دوربین، کیمرے یا کسی اور آلے کی مدد سے کبھی بھی براہ راست نے دیکھیں ورنہ آنکھوں کی بینائی ضائع ہو سکتی ہے۔ | 
یہ صفحہ دوست کو ای میل کیجیئے
پرِنٹ کریں
