’یہ تمام کارروائی ایک غلط فہمی کا نتیجہ ہے‘

کچھ لوگوں نے سیسر سپورٹ گروپ کے نام سے ایک تنظیم قائم کی ہے جو سیسر پروگرام تخلیق کرنے والے سوین جیشان کے لیے فنڈز اکٹھے کررہی ہے۔ اس وائرس کے پھیلنے کے بعد جیشان کو اوائل مئی میں جرمنی سے گرفتار کیا گیا تھا جس کے بعد انہوں نے یہ خطرناک پروگرام تخلیق کرنے کا اعتراف کرلیا تھا۔ اب انہیں رہا تو کردیا گیا ہے تاہم ان پر کمپیوٹر سبوتاژ کرنے کے الزامات کی تفتیش جاری ہے۔

سیسر وائرس یکم مئی سے پھیلنا شروع ہوا تھا اور اس نے نہایت تیزی سے ہزاروں کمپیوٹرز کو متاثر کرڈالا۔ سوین جیشان کو سات مئی کو گرفتار کیا گیا تھا۔ اگر ان پر کمپیوٹر سبوتاژ کرنے کے الزامات ثابت ہوگئے تو انہیں سات سال قید کی سزا ہوسکتی ہے۔ لیکن اب سیسر سپورٹ گروپ نے ان کی حمایت میں سر اٹھایا ہے۔ اس گروپ کا کہنا ہے کہ یہ تمام کارروائی ایک غلط فہمی کا نتیجہ ہے۔

گروپ کا کہنا ہے کہ جب جیشان نے یہ پروگرام بنایا تھا تو ان کی نیت اچھی تھی اور اس کا مقصد کچھ اور تھا۔ لیکن یہ تنظیم اب تک زیادہ فنڈز نہیں جمع کرسکی ہے۔ آخری اطلاعات تک کل ستاون پاؤنڈز جمع ہوسکے تھے جس میں سب سے زیادہ چندہ دس پاؤنڈ دیا گیا جبکہ سب سے کم صرف ایک سینٹ!