امریکی مشن مریخ پر پہنچ گیا  | | سیارہ مریخ سے ارسال کردہ پہلی تصاویر | |
مریخ پر زندگی کے آثار کا پتا لگانے کے لئے بھیجا جانے والا ناسا کا تحقیقاتی مشن کامیابی سے سیارہ مریخ پر اتر گیا ہے۔ چھ پہیوں والا تحقیقاتی مشن جس ’سپرٹ‘ یعنی روح کا نام دیا گیا ہے گرینچ کے معیاری وقت کے مطابق اتوار کی صبح چار بجکر پینتیس منٹ پر مریخ کی سطح پر اترا۔ تحقیقاتی مشن نے سیارے کی سطع پر اترتے ہی ناسا کے مرکز کو سگنل بھیجے جس سے اس بات کی تصدیق ہو گئی کہ اس پر مریخ کے گرد پائے جانے والے دباؤ سے کوئی فرق نہیں پڑا۔ یہ مشن مریخ پر تین ماہ تک رہے گا۔ اس عرصے میں وہ سیارے پر پائے جانے والے گڑھے کے بارے میں تحقیق کرے گا جس کے بارے میں خیال ہے کہ یہاں کبھی پانی ہوا کرتا تھا۔ یہ مشن سات ماہ قبل زمین سے روانہ ہوا تھا تاہم اس سفر کا سب سے اہم مرحلہ خلاء سے مریخ کی سطح پر اترنا تھا۔ یہ مسافت ’سپرٹ‘ انیس ہزار کلومیٹر فی گھنٹہ کی رفتار سے چھ منٹ میں طے کی۔ اتوار کی صبح جیسے ہی کلیفورنیا میں واقع ناسا کی تجربہ گاہ میں مشن کی کامیابی کی خبر پہنچی تو وہاں موجود عملے کے چہروں پر خوشی کی لہر دوڑ گئی۔ سپرٹ دو مریخ گاڑیوں میں سے ایک ہے۔ دوسری مریخ گاڑی کا نام ’آپرچونیٹی‘ ہے جو جنوری میں مریخ کے دوسری جانب اترے گی۔ دونوں مشن اس سرخ سیارے پر زندگی کے آثار تلاش کریں گے۔ سیارہ مریخ نظام شمسی میں زمین کے سب سے زیادہ قریب ہے۔ گزشتہ ماہ کے آخر میں برطانوی ساختہ بیگل ٹو مریخ پر پہنچا تھا تاہم اب تک اس سے کسی قسم کا کوئی سگنل موصول نہیں ہو سکا ہے۔ | 
یہ صفحہ دوست کو ای میل کیجیئے
پرِنٹ کریں
