آپ اس وقت اس ویب سائٹ کا ٹیکسٹ پر مبنی ورژن دیکھ رہے ہیں جو کم ڈیٹا استعمال کرتا ہے۔ مرکزی ویب سائٹ جہاں تمام تصاویر اور ویڈیوز موجود ہیں دیکھیے
دنیا میں پرندوں کی کل آبادی کتنی ہے؟
ایک تازہ تحقیق سے معلوم ہوا ہے کہ دنیا میں پرندوں کی کل آبادی پچاس ارب کے قریب ہے۔ چڑیا جو ہر شہر، ہر گاؤں، ہر گلی اور ہر گھر میں چہچہاتی نظر آتی ہیں صرف ان کی آبادی کی تعداد ایک اعشاریہ چھ ارب ہے۔
ان چڑیوں کے علاوہ چڑیوں کی تین اور نسلیں بھی ہیں جن میں یورپ میں پائی جانی والی سٹارلنگ اور بارن چڑیاں اور مینائیں بھی ہیں جن کی مجموعی تعداد ایک ارب سے زیادہ ہے۔
لیکن چڑیوں کی بہت سی نسلیں نایاب ہیں ان میں دس میں سے ایک نسل ایسی ہے جن کی تعداد پانچ ہزار سے بھی کم رہ گئی ہے۔
یہ بھی پڑھیے
آسٹریلیا کے شہر سڈنی کی نیو ساؤتھ ویلز یونیورسٹی کی ایک ٹیم کے مطابق پرندوں کی آبادی کے بارے میں اس تحقیق سے بہت سی معدوم ہونے والی نسلوں کے تحفظ کے لیے کی جانے والی کوششوں میں مدد ملے گی۔
End of سب سے زیادہ پڑھی جانے والی
اس تحقیق میں شامل ڈاکٹر کوری کالاگاہن نے بی بی سی نیوز کو بتایا کہ ’ہمارا بہت سا وقت اور مالی وسائل بنی نوع انسان کی فکر میں صرف ہوتے ہیں لیکن ہمیں ان حیوانات اور نباتات پر بھی غور کرنے کی ضرورت ہے جن کے ساتھ ہم اس کرۂ ارض پر بستے ہیں۔‘
دنیا میں موجود پرندوں کی درست تعداد معلوم کرنا انتہائی پیچدہ عمل ہے اور اس کا کوئی حتمی جواب موجود نہیں ہے۔
ماضی میں لگائے اندازوں کے مطابق دو سو سے چار سو ارب پرندے دنیا میں موجود ہیں اور ان کی دس ہزار سے تیرہ ہزار مختلف نسلیں یا اقسام ہیں۔
آسٹریلیا کے تحقیق کاروں نے نو ہزار سات سو مخلتف نسلوں کے پرندوں کا تجزیہ کیا اور یہ ڈیٹا انھوں نے پرندوں کو پسند کرنے اور ان کا مشاہدہ کرنے والوں سے اکھٹا کیا جو انٹرنیٹ پر دستیاب تھا۔
اس کے بعد انھوں نے اس ڈیٹا یا اعداد و شمار کو ماہرین سے بات کر کے بہتر کیا اور اس بارے زیادہ درست اندازے لگانے میں کامیاب ہوئے۔
یہ تحقیق جو پروسیڈنگ آف نیشنل اکیڈمی آف سائنسز کے جریدے میں شائع ہوئی ہیں اس کے مطابق نصف کرۂ شمالی یعنی یورپ، شمالی ایشیا، شمالی افریقہ، جزیرہ نما عرب کے کچھ حصوں اور بحیرہ منجمد شمالی میں بہت سے پرندے موجود ہیں۔ اس کے مقابلے میں مڈگاسکر اور بحیرہ منجمد جنوبی میں کم پرندے موجود ہیں۔
