راز کب چھپا کر رکھنے چاہییں؟
،تصویر کا ذریعہGetty Images
راز بڑی آسانی سے گرفت سے پھسل کر نکل جاتے ہیں۔
بی بی سی کے سینیئر صحافی مارک ٹلی نے اس سوال کا جائزہ لیا ہے کہ کیا ہر وقت سچ بولنا ہی مناسب حکمتِ عملی ہے یا پھر انسان کو دل میں کچھ راز چھپا کر بھی رکھنے چاہییں؟
ماہرینِ نفسیات کے مطابق راز دل میں چھپانے سے نہ صرف انسان ناخوش رہتا ہے بلکہ اس سے اس کی صحت بھی متاثر ہو سکتی ہے۔
اس لیے مناسب یہی ہے کہ کوئی راز نہ رکھا جائے۔
لیکن بعض اوقات راز رکھنا مجبوری بن جاتا ہے۔ ایسی ہی چند وجوہات یہاں پیش کی جاتی ہیں:
1. جب راز آپ کی ذاتی زندگی سے متعلق ہو
،تصویر کا ذریعہGetty Images
ہماری بعض عادات اور نجی خصوصیات اگر ظاہر کی جائیں تو وہ ہمارے لیے خجالت کا باعث بن سکتی ہیں۔
مثلاً آپ صبح اٹھ کر ایک خاص قسم کا رقص کرتے ہیں، یا آپ کو ٹینڈے کھانے سے نفرت ہے، یا آپ کو چھپکلیوں سے ڈر لگتا ہے، یا ہائی سکول میں آپ کی چھیڑ کیا تھی؟
End of سب سے زیادہ پڑھی جانے والی
جب تک آپ کی یہ خفیہ خصوصیات کسی اور کو نقصان نہیں پہنچاتیں، اس وقت تک ان کے بارے میں دوسروں کا جاننا ضروری نہیں ہے۔
2. جب کوئی دوست آپ کو کوئی خفیہ بات بتائے
،تصویر کا ذریعہGetty Images
اگر آپ نے کسی دوست سے وعدہ کر لیا ہے کہ آپ اس کا راز راز رکھیں گے، تو پھر اس وعدے کو نبھانا ہی پڑے گا۔
کسی دوست کا اعتماد توڑنے سے دوستی کے رشتے میں ہمیشہ کے لیے دراڑ پڑ سکتی ہے۔
اس سے بھی بدتر یہ ہے کہ اگر آپ نے دوست کا راز کسی اور کے سامنے کھول دیا تو پھر وہ آپ کے ہاتھ سے نکل گیا اور اب اسے چاروں طرف پھیلنے سے کوئی نہیں روک سکتا۔
اس کی ایک مثال اس وقت سامنے آئی جب ہیری پاٹر کی مصنفہ جے کے رولنگ نے 2012 میں روبرٹ گیلبریتھ کے فرضی نام سے ’کیژوئل ویکینسی‘ نامی ناول لکھا۔
یہ نام راز میں رکھا گیا اور ’مٹھی بھر‘ لوگوں کے علاوہ کسی کو اس کی ہوا نہیں لگنے دی گئی۔
لیکن پھر رولنگ کے وکیل نے اپنی بیوی کی سہیلی کو یہ بات بتا دی، اس نے ٹوئٹر پر شیئر کر دی، اور دیکھتے ہی دیکھتے دنیا کو پتہ چل گیا۔
3. جب یہ تجارتی راز ہو
،تصویر کا ذریعہGetty Images
بہت سی کمپنیاں خفیہ فارمولے استعمال کرتی ہیں تاکہ اپنے حریفوں سے سبقت لے جائیں۔
کوکا کولا کے بارے میں مشہور ہے کہ اس کا خفیہ فارمولا ایک لاکر میں رکھا جاتا ہے۔ اسی طرح گوگل کا بھی اپنا خاص سرچ فارمولا ہے، جب کہ ایپل اپنی تمام آنے والی مصنوعات کی معلومات کو کئی پردوں میں چھپا کر رکھتی ہے۔
ظاہر ہے کہ ایسے رازوں کا افشا ہو جانا ان کمپنیوں کے لیے تباہ کن ثابت ہو سکتا ہے۔
4. اپنی حفاظت کے لیے
،تصویر کا ذریعہGetty Images
ذاتی رازوں کو کسی ماہرِ نفسیات یا کونسلر کے سامنے ظاہر کرنے سے بہت سی نفسیاتی گتھیاں سلجھ سکتی ہیں۔
تاہم ایسا کرنے سے پہلے سوچ لیجیے کہ آیا آپ اس مقصد کے لیے تیار ہیں یا نہیں۔
5. جب آپ کسی کو حیرت زدہ کر دینا چاہتے ہوں
،تصویر کا ذریعہGetty Images
بعض اوقات آپ کسی فرد کے لیے اچانک پارٹی منعقد کر کے یا تحفہ دے کر اسے حیران کر دینا چاہتے ہیں۔ لیکن اس سے پہلے یہ معلوم کر لیں کہ یہ فرد اس طرح سے حیران ہونا پسند کرتا ہے یا نہیں۔
اس کی مثال بڑی دلچسپ ہے۔ مارک کرے فورڈ نے چھ مہینے لگا کر چھپ چھپ کر گھڑسواری سیکھی اور پھر جرمنی سے خاص طور پر زرہ بکتر منگوائی تاکہ گھوڑے پر سوار ہو کر پرانے زمانے کے سورماؤں کی طرح اپنی گرل فرینڈ کو شادی کا پیغام دے سکیں۔
تاہم جونھی مارک پیغام دینے کے لیے جھکے، وہ گھوڑے سے گر گئے اور ان کی تمام محنت اور رازداری اکارت گئی۔
تاہم خوش قسمتی سے ٹریسی نے ان کی پیشکش قبول کر لی۔
6. جب پیچیدہ معاہدے طے کرنا ہوں
،تصویر کا ذریعہGetty Images
بین الاقوامی تعلقات میں بعض اوقات معاملات کو اس وقت تک پسِ پردہ رازداری سے طے کیا جاتا ہے جب تک اس کے اعلان کے لیے حالات سازگار نہ ہو جائیں۔
اگر اس قسم کے راز قبل از وقت طشت از بام ہو جائیں تو فریقین کو سیاسی اور سفارتی نقصان پہنچ سکتا ہے۔
7. لوگوں کی سلامتی کے لیے
،تصویر کا ذریعہGetty Images
دوسری جنگِ عظیم کے دوران بہت سے راز ایسے تھے جن پر لوگوں کی زندگیوں کا انحصار تھا۔
کائلر خاندان نے نازیوں کے مقبوضہ ڈنمارک میں سے ایک ہزار یہودیوں کو خفیہ طور پر نکال کر سویڈن پہنچایا اور اس مقصد کے لیے دو دن کے اندر اندر خفیہ طور پر دس لاکھ کرونر عطیات کی شکل میں اکٹھے کیے۔
یہ رقم سپاہیوں کو بطور رشوت اور ملاحوں کو بطور معاوضہ دی گئی تاکہ وہ لوگوں کو سمندر کے پار سویڈن تک پہنچا سکیں۔
اس کے علاوہ دنیا کی ہر حکومت اپنے دشمن ملکوں اور دہشت گردوں کے بارے میں خفیہ معلومات رکھتی ہے تاکہ ان کی طرف سے ممکنہ حملوں کو روکا جا سکے۔
اسی مقصد کے لیے مختلف ملکوں کے اندر ایسے ادارے کام کرتے ہیں جن کا نام ہی ان کے کام کی نشان دہی کرتا ہے، یعنی سیکرٹ سروس۔
