حسن مجتبیٰ بی بی سی اردو ڈاٹ کام، نیویارک

	ڈاکٹر عافیہ پانچ سال سے لاپتہ تھیں۔

یہ بات عافیہ صدیقی کی ایک دفاعی وکیل ایلین شارپ نے بی بی سی اردو ڈاٹ کام کو بوسٹن سے بتائي۔

ایلین شارپ نے بتایا کہ ڈاکٹر صدیقی پر امریکی سیکیورٹی اہلکاروں پر ان کی ہی رائیفل چھین کر قتلانہ حملہ کرنے کے دو الزامات لگائے جائیں گے۔

عافیہ صدیقی پر مجموعی طور پر چھ الزامات عائد کیے جائیں گے جن کے ثابت ہونے پر انہیں زیادہ سے زیادہ بیس سال کی سزا مل سکتی ہے-

ایلن شارپ کے مطابق ’انہوں نے (امریکی حکومت نے) ڈاکٹرعافیہ کیخلاف دہشتگرد تنظیم سے تعلق ہونے کا الزام نہیں لگایا ہے جوحیران کن بات ہے-‘

انہوں نے کہا کہ ڈاکٹر عافیہ نے ان الزامات سے انکار کیا ہے۔

	ڈاکٹر عافیہ نے اعلی تعلیم امریکہ سے حاصل کی

ایلین شارپ اس سے قبل عافیہ صدیقی کی مبینہ گمشدگی اور دوسرے امور پر بھی انکےخاندان کیطرف سے مقدمے لڑتی رہی ہیں-

پانچ برس سے لاپتہ پاکستانی ڈاکٹر کو گزشتہ ماہ عدالت کے سامنے پیش کیاگیا تھا۔

نیویارک میں ایف بی آئی اور نیویارک کے پولیس کمشنر ریمنڈ کیلی نے کہا تھا کہ ڈاکٹر عافیہ کو افغانستان میں غزنی کے صوبے سے گرفتار کیا گیا تھا۔

ڈاکٹر عافیہ پر الزام ہے کہ انہوں نے اٹھارہ جولائی کو ایف بی آئی اور امریکی فوجیوں کی ایک تفتیشی ٹیم پر ایک فوجی کی بندوق چھین کر فائرنگ کر دی تھی۔ اس ٹیم میں شامل ایک امریکی فوجی کی جوابی فائرنگ اور اس کے بعد کشمکش میں ڈاکٹر عافیہ زخمی ہو گئی تھیں۔

اس بیان کے مطابق ڈاکٹر عافیہ ایف بی آئی کو کافی عرصے سے دہشت گردی کے الزامات میں مطلوب تھیں۔

امریکی محکمہء انصاف کی پریس ریلیز کے مطابق ڈاکٹر صدیقی کی تحویل سے ملنے والے سامان میں سے ہاتھ سے تحریر کردہ نوٹس ملے جن میں قتل عام کے مبینہ منصوبے شامل تھے۔ ان میں نیویارک کے اہم مقامات اور عمارات کے بارے میں تفصیلات شامل تھیں-

حسب ممعول، امریکی محکمء انصاف کے بیان کے آخر میں ایک سطر میں درج ہے کہ کوئی بھی شخص اس وقت تک بے گناہ ہی مانا جائے گا جبتک عدالت میں اسکے خلاف الزامات ثاب نہیں ہو جاتے-