اوبامہ افغانستان کے بعد عراق بھی جائیں گے۔

وہ اپنے پہلے بین الاقوامی دورے کے سلسلے میں سنیچر کو ہی کابل پہنچے تھے۔

مسٹر اوبامہ امریکی کانگریس کی ایک ٹیم کے ہمراہ اتوار کے روز افغان صدر حامد کرزئی سے ملاقات کریں گے۔

افغانستان کے بعد مسٹر اوبامہ عراق، اردن، اسرائیل، جرمنی، فرانس اور برطانیہ کا دورہ بھی کریں گے۔

نامہ نگاروں کے مطابق مسٹر اوبامہ افغانستان میں سکیورٹی کے معاملے پر بات چیت کریں گے۔ صدارتی انتخاب میں اپنے حریف جان مکین کےمقابلے میں سکیورٹی کے معاملات پر ان کی گرفت کو کمزور سمجھا جارہا ہے۔

اس ہفتے ایک اہم تقریر میں مسٹر اوبامہ نے کہا تھا کہ امریکہ کو عراق کے بجائے افغانستان پر توجہ مرکوز کرنی چاہیے۔

افغانستان کے جنوبی صوبے میں طالبان کی مزاحت میں حالیہ دنوں میں اضافہ ہوا ہے اور اسی ہفتے نورستان میں طالبان کے ایک بڑے حملے میں نو امریکی فوجی ہلاک ہو گئے تھے۔

	دورے سے قبل سکیورٹی سخت کر دی گئی تھی

یہ پوچھے جانے پر کہ وہ عراقی اور افغان حکام کو کیا پیغام دیں گے، مسٹر اوبامہ نےکہا کہ وہ ’زیادہ بولنے کے مقابلے میں سننے کو ترجیح دیں گے۔‘

’میں وہاں ایک سینیٹر کی حیثیت سے جا رہا ہوں۔ امریکہ میں ایک وقت میں ایک ہی صدر ہوتا ہے اور اس طرح کے پیغامت دینا صدر کا کام ہے۔‘

لیکن انہوں نے کہا کہ وہ دونوں ملکوں میں فوجی کمانڈروں سے بات چیت کریں گے اور ان کے مسائل معلوم کریں گے۔

اس دورے پر مسٹر اوبامہ کے ساتھ امریکی ٹی وی چینلوں کی پوری ٹیم سفر کر رہی ہے اور ان کے ہر بیان پر نہ صرف صحافیوں بلکہ جان مکین کے کیمپ کی نگاہیں بھی ٹکی رہیں گی۔