ڈان بریان بی بی سی نیوز

	حکومت نے جو ڈاربی کے اقدام کی تعریف کی تھی

جو ڈاربی نے جب ابو غریب میں قید عراقیوں کے ساتھ زیادتیوں کی تصاویر دیکھیں تو وہ ششدر رہ گئے تھے۔

وہ تصویریں دیکھ کر اس قدر پریشان ہوئے کہ سخت گرمی کی رات میں بغداد کی سڑکوں پر سگریٹ پھونکتے رہے اور یہ سوچ سوچ کر پریشان ہوتے رہے کہ اب انہیں کیا کرنا چاہیے۔

ان تصاویر پر جنہیں دنیا دو ہزار چار میں دیکھ کر پریشان ہو گئی تھی، جو ڈاربی کی نظراس وقت اتفاقاً پڑ گئی تھی جب وہ ایک ریزرو فوجی کی حیثیت سے ابو غریب میں تعینات کُل وقتی فوجیوں کے ساتھ کام کر رہے تھے۔

ان تصاویر میں جو لوگ عراقی قیدیوں کے ساتھ زیادتی کرتے ہوئے دکھائی دے رہے تھے ان میں ان کے ساتھ کام کرنے والے وہ مرد اور خواتین بھی تھے جنہیں وہ سکول کے دنوں سے جانتے تھے۔

اس موقع پر خاموشی اختیار کرنے کی بجائے انہوں نے تصاویر کو دوسروں کو دکھانے کا جو فیصلہ کیا اس نے ان کی زندگی کو ہمیشہ کے لیے تبدیل کر دیا۔

مجھے معلوم تھا کہ کہ میں نے جو کیا کئی لوگ اس سے متفق نہیں ہوں گے۔ کچھ لوگ ایسے ہوتے ہیں جو یہ نہیں سوچتے کہ یہ غلط ہے یا درست۔ وہ بس یہی کہتے ہیں کہ میں نے عراقیوں کی وجہ سے اپنے امریکی فوجیوں کو جیل بھجوا دیا۔

اذیتوں کی تصاویر
جو ڈاربی کو جب پہلی مرتبہ ایک سی ڈی پر محفوظ یہ تصاویر دی گئیں تو انہیں عراق میں تعینات ہوئے سات ماہ ہو چکے تھے۔ یہ سی ڈی انہیں ایک ساتھی چارلس گرینر نے دی تھی۔

سی ڈی پر محفوظ زیادہ تر تصاویر بغداد اور ہلہ کے شہروں کی تھیں تاہم ان میں قیدیوں کے ساتھ زیادتیوں کی بدنام زمانہ تصویریں بھی تھیں۔

شروع شروع میں تو جو ڈاربی کو اپنی آنکھوں پر یقین نہیں آیا کی کہ جو وہ دیکھ رہے ہیں وہ سچ ہے۔

’میں پہلی تصویر دیکھ کر ہنس پڑا اور سوچا کہ یہ تو محض کچھ برہنہ لوگوں کا مینار سا بنا ہوا ہے۔ مجھے نہیں پتا تھا کہ یہ برہنہ لوگ عراقی قیدی تھے۔‘

’میں نے سوچا فوجی اس قسم کی احمقانہ حرکتیں کرتے رہتے ہیں، لیکن جوں جوں میں مزید تصویریں دیکھتا گیا تو مجھے محسوس ہونے لگا کہ یہ تصویریں اصل میں کیا ہیں۔‘

’ان میں میرے ساتھی چارلس گرینر کی تصویریں تھیں جن میں وہ تین قیدیوں کو پِیٹ رہا تھا۔اگلی تصویر ایک برہنہ عراقی مرد کی تھی جس کا چہرہ بوری سے ڈھکا ہوا تھا اور اس سے اگلی تصویر میں ایک عراقی مرد اپنے گھٹنوں پر کھڑا تھا اور اس کے چہرہ پر بھی ریت والی بوری بندھی ہوئی تھی۔‘

سی ڈی پر محفوظ زیادہ تر تصاویر بغداد اور ہلہ کے شہروں کی تھیں تاہم ان میں قیدیوں کے ساتھ زیادتیوں کی بدنام زمانہ تصویریں بھی تھیں۔

صیغہ راز میں رکھنے کا وعدہ

جو ڈاربی کو معلوم ہوگیا تھا کہ جو کچھ انہوں نے تصویروں میں دیکھا وہ غلط تھا لیکن یہ تصویریں آگے کسی کو دینے کا فیصلہ کرنے میں انہیں تین ہفتے لگ گئے۔ اور جب آخر کار انہوں نے تصویریں دے دیں تو ان سے وعدہ کیا گیا کہ ان کا نام راز میں رہے گا۔

اس وعدے کے باوجود انہیں تصویروں میں نظر آنے والے فوجیوں سے خطرہ محسوس ہو رہا تھا۔ ’مجھے خطرہ تھا کہ وہ اس کا بدلہ لیں گے، نہ صرف وہ بلکہ دوسرے فوجی بھی۔‘

’میں جب رات کو سوتا تو ان سے صرف سوگز کے فاصلے پر ہوتا تھا، اور میں جس کمرے میں سویا کرتا تھا اس کا دروازہ بھی نہیں تھا۔‘

سماعت کے دوران وہ سارا وقت مجھے نفرت بھری نظروں سے گُھورتا رہا ہے۔ میں جتنی دیر بھی وہاں رہا، اس نے مجھ سے نظریں نہیں ہٹائیں۔ میرا خیال ہے کہ یہ ایسی نفرت ہے جو گرینر اس دن تک نہیں بھولے گا جب تک کہ وہ قید سے رہا نہیں ہو جاتا

آخر کار جب مذکورہ فوجیوں کو ابو غریب سے ہٹا دیا گیا تو جو ڈاربی نے سوچا کہ ان کی مصیبت ختم ہو گئی ہے۔

لیکن ایسا نہیں ہوا۔ بلکہ جب وہ سینکڑوں فوجیوں کے ساتھ عراق میں ایک چائے خانے میں بیٹھے ہوئے تھے تو امریکی وزیر دفاع ڈونلڈ رمزفیلڈ ٹی وی پر آئے اور جو ڈاربی کا نام لیکر شکریہ ادا کیا کہ انہوں نے تصویریں آگے پہنچائیں۔

اس بارے میں جو ڈاربی کا کہنا تھا: ’ میرا خیال نہیں کہ یہ محض اتفاق تھا۔ اس قسم کے موقعوں پر جو کچھ کہا جاتا ہے وہ زیادہ تر پہلے سے طے ہوتا ہے۔‘

’لیکن مجھے وزیردفاع کی طرف سے ایک خط بھی ملا جس میں کہا گیا تھا کہ میرا نام لینے میں کوئی بند نیتی شامل نہیں تھی، وہ محض میری تعریف کرنا چاہ رہے تھے اور یہ کہ انہیں اس بات کی کوئی خبر نہیں تھی کہ مجھ سے نام راز میں رکھے جانے کا وعدہ کیا گیا تھا۔‘

’مجھے اس بات پر یقین نہیں آتا کہ امریکہ کے وزیر دفاع کو یہ نہیں معلوم تھا کہ کسی بھی جرم کی تفتیش میں مرکزی گواہ کا نام ظاہر نہیں کیا جاتا۔‘

	وزیردفاع کے خط میں کہا گیا تھا کہ میرا نام لینے میں کوئی بند نیتی شامل نہیں تھی: جو ڈاربی

غداری کا خطاب
ان کی اہلیہ کے وہم و گمان میں بھی نہیں تھا کہ ابو غریب کی بدنام زمانہ تصاویر جو ڈاربی نے حکام کے حوالے کی تھیں، لیکن جب ان کے شوہر کا نام منظر عام پر آیا تو انہیں اپنی بہن کے گھر جا کر پناہ لینا پڑی۔ ان کے اپنے گھر کی دیواروں پر لوگوں نے ان کے خلاف نعرے لکھ دیے تھے اور اپنے قصبے میں کئی لوگوں نے انہیں غدار کا کہنا شروع کر دیا۔

اس بارے میں جو ڈاربی کا کہنا تھا: ’ مجھے معلوم تھا کہ کہ میں نے جو کیا کئی لوگ اس سے متفق نہیں ہوں گے۔ کچھ لوگ ایسے ہوتے ہیں جو یہ نہیں سوچتے کہ یہ غلط ہے یا درست۔ وہ بس یہی کہتے ہیں کہ میں نے عراقیوں کی وجہ سے اپنے امریکی فوجیوں کو جیل بھجوا دیا۔‘

اپنے قصبے میں ان کے خلاف پائی جانے والی مخالفت کا نتیجہ یہ ہے کہ وہ اب بھی وہاں نہیں جا سکتے۔

جب ڈونلڈ رمزفیلڈ نے ان کے راز سے پردہ اٹھا دیا تو انہیں فوراً عراق سے نکال لیا گیا اور اگلے چھ ماہ تک انہیں مسلح محافظوں کی حفاظت میں رکھا گیا۔

اس کے بعد سے جو ڈاربی فوج چھوڑ چکے ہیں تاہم وہ قیدیوں کے ساتھ زیادتی کے چند مجرموں کی سماعت کے دوران گواہی دے چکے ہیں۔ انہیں سب سے زیادہ ڈر چارلس گرینر سے لگتا ہے۔

’سماعت کے دوران وہ سارا وقت مجھے نفرت بھری نظروں سے گُھورتا رہا ہے۔ میں جتنی دیر بھی وہاں رہا، اس نے مجھ سے نظریں نہیں ہٹائیں۔ میرا خیال ہے کہ یہ ایسی نفرت ہے جو گرینر اس دن تک نہیں بھولے گا جب تک کہ وہ قید سے رہا نہیں ہو جاتا۔‘

ڈاربی اور ان کا خاندان ایک نئے قصبے میں جا بسے ہیں۔ وہ ملازمت بھی نئی جگہوں پر کر رہے ہیں۔ وہ اپنی شناخت بدلنے کے علاوہ سب کچھ کر چکے ہیں۔

اس سب کے باوجود جو ڈاربی خود کو نہ تو ہیرو کہتے ہیں اور نہ ہی کوئی غدار۔ محض ’ایک فوجی، نہ اس سے زیادہ نہ کم۔‘

’میں نے کبھی ایک لمحے کے لیے بھی یہ نہیں سوچا کہ میں نے عراق میں تصویریں متعلقہ لوگوں کے حوالے کرنے کا جو فیصلہ کیا تھا وہ غلط تھا۔‘