چارلس ہیوی لینڈ بی بی سی، کابل

	گاؤں میں رہنے والوں کا کہنا ہے کہ ان پر کئی گھنٹے فضائی حملے ہوتے رہے

علاقے کے لوگوں نے بی بی سی کو بتایا کہ ان کے خیال میں پچاس سے زائد شہری ہلاک ہوئے ہیں جن میں عورتیں اور بچے بھی شامل ہیں۔

نیٹو کی سربراہی میں فوجی دستے آئساف کا کہنا ہے کہ کارروائی ہوئی ہے لیکن انہیں عام شہریوں کی ہلاکتوں کا کوئی علم نہیں ہے۔

گرشک کے قریب ایک گاؤں سے درجنوں افراد نے بی بی سی کو فون کر کے اس بمباری کی اطلاع دی۔ ان کے مطابق یہ بمباری دو سے تین گھنٹے جاری رہی۔

لوگوں کا ماننا ہے کہ اس حملے میں پچاس سے اسی شہری ہلاک ہوئے ہیں جن میں بچے اور عورتیں بھی شامل ہیں اور وہ ان کی لاشوں کو گرشک لا رہے ہیں تا کہ حکام کو دکھا سکیں۔

ہلمند صوبے کے پولیس چیف محمد حسین اندیوال کا کہنا ہے کہ عام شہری ہلاک ہوئے ہیں لیکن انہوں نے کوئی تعداد نہیں بتائی۔ انہوں نے کہا کہ بیرونی افواج نے اس حملے سے پہلے افغان حکام سے کسی بھی قسم کا کوئی مشورہ نہیں کیا۔

آئساف کے ایک ترجمان نے بی بی سی کو بتایا کہ گرشک کے علاقے میں دو دن سے کارروائی جاری ہے جس میں فضائی طاقت اور بمباری کا استعمال بھی ہو رہا ہے۔ ترجمان نے کہا کہ اس کارروائی میں شدت پسند ہلاک ہوئے ہیں لیکن کسی بھی عام شہری کی ہلاکت ان کے علم میں نہیں ہے۔