شریفی کو عراق میں نامعلوم افراد نے اغواء کر لیا تھا

پیٹر سٹوکر نے کہا ایرانی سفارت کار جلال شریفی کے پیروں ، ٹانگوں اور کمر کے علاوہ ناک کے نیچے بھی زخموں کے نشانات تھے تاہم انہوں نے کہا کہ وہ یہ یقین سے نہیں کہ سکتے کہ یہ زخم تشدد کی وجہ سے ہی ہوئے تھے۔

ایرانی ذرائع ابلاغ نے الزام عائد کیا کہ جلال شریفی کو عراق میں امریکی خفیہ ادارے سی آئی اے نے تشدد کا نشانہ بنایا تھا۔

شریفی کو اس سال فروری میں عراق سے اغواء کر لیا گیا تھا اور انہیں گزشتہ ہفتے رہا کیا گیا ہے۔ امریکہ اس معاملہ میں ملوث ہونے سے انکار کرتا ہے۔

شریفی نے جو بغداد میں ایرانی سفارت خانے میں ’سیکنڈ سیکریٹری‘ تھے کہا کہ انہیں امریکی خفیہ ادارے سی آئی اے کے تحت کام کرنے والے عراقی ایجنٹوں نے اغواء کیا تھا۔

ایران کےسرکاری نشریاتی اداروں نے شریفی کے حوالے سے بتایا کہ انہیں دن رات تشدد کا نشانہ بنایا جاتا رہا اور ان سے عراق میں مزاحمت کاروں سے ایرانی حکومت کو مبینہ طور پر ملنے والی امداد کے بارے میں سوالات کیئے جاتے رہے۔

ایرانی ٹی وی نے شریفی کی ہسپتال میں علاج کے دوران تصاویر دکھائیں اور ان کے معالج کا انٹرویو بھی نشرکیا۔ اس انٹرویو میں ڈاکٹر نے دعویٰ کیا کہ شریفی کے پیروں پر ڈرل مشین سے چھید کیئے گئے، ان کی ناک کی ہڈی توڑ دی گئی، ان کا کان زخمی کردیا گیا اور گردن اور کمر پر بھی تشدد کے نشانات پائے گئے۔

ریڈ کراس کے سربراہ نے کہاکہ وہ شریفی سے ہسپتال میں مل کر خوش ہوئے کیونکہ انہیں وہ عراق میں تلاش نہیں کر سکے تھے۔

وائٹ ہاوس کے ترجمان گارڈن جونڈور نے گزشتہ ہفتے کہا تھا کہ شریفی کے اغواء سے امریکہ کا کوئی تعلق نہیں اور وہ ان کی بازیابی کا خیر مقدم کرتے ہیں۔

انہوں نے ایرانی حکومت کی طرف سے کیئے جانے والے دعوؤں کو ’شعبدہ بازیاں‘ قراردیتے ہوئے کہا کہ وہ اس طرح کے ہتھکنڈوں سے اصل مسائل سے توجہ ہٹانا چاہتی ہے۔

شریفی کو تین اپریل کو پندرہ برطانوی قیدیوں کی ایران کی قید سے رہائی سے دو دن قبل رہا کیا گیا تھا۔