مذکورہ شلوار قمیض جمائما نے پیرس میں ہونے والی شادی کی اسلامی تقریب میں پہنا تھا

خبررساں ادارے پریس ایجسنی کے مطابق یہ شلوار قمیض جمائما نے پیرس میں ہونے والی شادی کی اسلامی تقریب میں پہنا تھا۔

یہ لباس اپریل کے آخر میں لندن کی مشہور برٹش لائبریری میں ایک نمائش میں دکھائے جائے گا۔

’مقدس: ہمارا مشترکہ سرمایہ‘ کے عنوان سے ہونے والی اس نمائش میں دنیا بھر سے یہودیوں، مسلمانوں اور عیسائیوں کے مقدس صحیفوں کے نہایت شاندار اور تاریخی نمونے دکھائے جائیں گے۔

نمائش میں انجیل مقدس کا مشہور صحیفہ ’ کوڈیکس سنائٹیکس‘ بھی پیش کیا جائےگا جس کا تعلق تقریباً تین سو پچاس عیسوی سے ہے۔ اس صحیفے کو عیسائیت کی تاریخ میں کلیدی حیثیت حاصل ہے۔

مشہور آنجہانی یہودی تاجر سر جیمز گولڈ سمتھ کی بیٹی جمائما خان نے اسلام قبول کر لیا تھا اور انیس سو پچانوے میں پاکستانی کرکٹ ٹیم کے سابق کپتان عمران خان سے شادی کی تھی۔

دو ہزار چار میں عمران خان اور جمائما میں طلاق ہو گئی تھی جس کے بعد جمائما اور برطانوی اداکار ہیؤ گرانٹ کے درمیان تعلقات قائم ہو گئے۔

برٹش لائبریری کے ایک ترجمان نے اس بات کی تردید کی ہے کہ جمائما کے لباس کو نمائش کے لیئے منتخب کرنے سےایک سنجیدہ اور اہم تقریب کی توقیر میں کمی ہو گی۔‘

	ہیوگرانٹ اور جمائما خان نے تین سال ساتھ گزارنے کے بعد فروری میں علیحدگی اختیار کرلی تھی

ترجمان کے مطابق مذکورہ لباس کے نمائش میں شامل کئیے جانے سے وہ لوگ بھی نمائش دیکھنے آ سکتے ہیں جو شائد مقدس صحیفوں کو دیکھنے میں کوئی دلچسپی نہ رکھتے ہوں۔

ان کا کہنا تھا : میں نہیں سمجھتا کہ اس سے لباس عامیانہ ہو جائے گا بلکہ اب یہ زیادہ سے زیادہ شائقین کی نظر میں آئے گا اور ہو سکتا ہے کہ جمائما کے سلیبرٹی ہونے کے ناطے لوگ اسے دیکھنے میں زیادہ دلچسپی لیں۔‘

برٹش لائبریری کی یہ نمائش ستائیس اپریل کو شروی ہوگی اور تئیس ستمبر تک جاری رہے گی۔