طالبان کے ترجمان نے فوری طور پر ردعمل ظاہر نہیں کیا ہے

افغان وزارت دفاع نے سنیچر کو ہلاک ہونے والے مشتبہ طالبان کی تعداد 40 بتائی ہے۔ وزارت کا کہنا ہے کہ جھڑپوں میں ’دشمن‘ کا ایک اڈہ تباہ کردیا گیا ہے۔

دریں اثناء صوبے کے دیگر حصوں سے نیٹو فوج نے 21 مشتبہ طالبان کو گرفتار کرنے کا دعوٰی بھی کیا ہے۔

تازہ جھڑپ صوبے کے گرشک ضلعے میں ہوئی ہے اور میں بیس ہزار نیٹو فوجی حصہ لے رہے ہیں۔ آپریشن کے دوران فضائی اور زمینی فوج استعمال کی گئی ہے۔ نیٹو فوج کا کہنا ہے کہ صوبے کے دیگر حصوں میں جھڑپوں میں 23 افراد ہلاک ہوئے ہیں۔

طالبان کے ترجمان نے فوری طور پر ردعمل ظاہر نہیں کیا ہے تاہم ہر روز ہونے والی بھاری ہلاکتوں کی تردید کرتے رہے ہیں۔

فریقین کے دعوؤں کی آزاد ذرائع سے تصدیق عموماً ناممکن ہوتی ہے۔

2001 میں طالبان کی حکومت کے خاتمے کے بعد سے افغانستان میں یہ بدترین تشدد ہے۔

افغانستان میں برطانوی فوج کے سربراہ کا کہنا ہے کہ طالبان ان کے لیئے ان کی توقعات سے زیادہ مشکل ’ٹارگٹ‘ ثابت ہورہے ہیں۔ اس سال افغانستان میں مختلف جھڑپوں میں 130 غیر ملکی فوجی ہلاک ہوچکے ہیں۔