 | | | اس پرواز پر 182 مسافر سوار تھے |
لندن سے واشنگٹن جانے والی پرواز کو ہنگامی حالات میں بوسٹن اتارے جانے کے بعد جہاز پر سوار ایک انسٹھ سالہ خاتون مسافر کوگرفتار کر لیا گیا ہے۔ جہاز کو لڑاکا طیاروں کے ہمراہ لے جایا گیا اور پھر واشنگٹن کی اس پرواز کو بوسٹن اتار لیا گیا۔ امریکہ میں ٹرانسپورٹ کے حکام نے بتایا ہے کہ اس خاتون اور جہاز کے عملے کے درمیان کشیدگی ہوئی تھی جس کے بعد ہی پرواز کو بوسٹن اترنے کا حکم گیا۔ ہوائی کمپنی یونائیٹڈ ائر لائنز کی پرواز نمبر 923 لندن کے ہیتھرو ائرپورٹ سے روانہ ہوئی تھی اور اسے واشنگٹن کے ڈیلس ائرپورٹ پر اترنا تھا لیکن جب عملے کو اس خاتون مسافر کا رویہ قابل تشویش لگا تو حکام نے اسے واشنگٹن سے ہٹ کر اترنے کا حکم دیا تھا۔ امریکہ کے تفتیشی ادارے ایف بی ائی کی ترجمان کے مطابق اس خاتون کو کلاسٹرو فوبیا کا دورہ پڑا اور وہ عملے کے لیئے ایک مسئلہ بن گئیں۔ ترجمان کے مطابق وہ رپورٹیں غلط تھیں جس میں کہا گیا تھا کہ اس خاتون کے پاس ایک پیچ کس اور ایسا کاغذ تھا جس میں القاعدہ کا ذکر تھا۔ اس خاتون کے پاس جلد کی ایک کریم اور ماچس تھی۔ امریکہ کے ٹرانسپورٹ کے نظام کے لیئے سکیورٹی کے اہلکار نے بتایا ہے کہ ابھی تک گرفتار خاتون کے دہشت گردوں سے روابط کی تصدیق نہیں ہو سکی ہے۔ | 
مذہبی اور نسلی بنیادوں پر چیکنگ؟
