یہ ہلاکتیں چار مختلف واقعات میں ہوئیں

اسرائیلی فوج کا کہنا ہے کہ ہلاک ہونے والوں میں سے چار افراد کو بیت الہیہ کے علاقے میں ایک ہیلی کاپٹر حملے میں مارا گیا۔ فوج کے مطابق مرنے والوں میں تین شدت پسند اور ایک عام فلسطینی شامل ہیں اور یہ افراد اسرائیل پر ایک راکٹ حملے کی تیاری کر رہے تھے۔

عینی شاہدین کے مطبق مغربی کنارے کے علاقے انبتہ میں ایک شدت پسند اسرائیلی فوج کے ساتھ فائرنگ کے تبادلے میں مارا گیا جبکہ دیگر دو شدت پسندوں کو نابلوس کے علاقے میں واقع بلاتہ مہاجر کیمپ اورکباتیہ کے علاقے میں مارا گیا۔ ان تینوں افراد کا تعلق الاقصٰی بریگیڈ سے بتایا جاتا ہے۔

اسرائیلی فوج کا یہ بھی کہنا ہے کہ بیت الہیہ کے علاقے میں اسرائیلی ہیلی کاپٹر حملے کے بعد اسلامک جہاد کے کارکنوں اور سرحد پر تعینات اسرائیلی فوج کے درمیان شدید فائرنگ کا تبادلہ ہوا۔

فوجی ترجمان کے مطابق ’فوج نے ایک ایسے کمانڈو کی نشاندہی کی جو راکٹ حملے کی تیاری کر رہا تھا۔ جب اس پر فائرنگ کی گئی تو لڑائی چھڑ گئی‘۔ اسلامک جہاد نے بھی اس بات کی تصدیق کی ہے کہ اس کے کارکن اس واقعہ میں شریک تھے۔

اگست 2005 میں اسرائیلی فوج کی واپسی کے بعد یہ پہلا موقع ہے کہ اسرائیل نے غزہ کے علاقے میں فضائی حملہ کیا ہے۔