ایران اور امریکہ کےد رمیان باقاعدہ سفارتی تعلقات کا وجود نہیں

ایران کے حکومتی ترجمان غلام حسن الہام کے مطابق اس خط میں بین الاقوامی حالات کا جائزہ لیا گیا ہے اور دنیا کے موجودہ سیاسی حالات اور مسائل کے حل کی نئی تجاویز بھی دی گئی ہیں۔

این پی ٹی سے علیحدگی کی دھمکی

تاہم ترجمان نے یہ نہیں بتایا کہ اس خط میں ایران کے جوہری تنازعے کا ذکر ہے یا نہیں کیونکہ یہی وہ مسئلہ ہے جو امریکہ اور ایران کے درمیان حالیہ تناؤ کی وجہ ہے۔ امریکہ ایران پر جوہری ہتھیاروں کی تیاری کے لیئے کوشش کرنے کا الزام لگاتا ہے جسے ایران اب تک مسترد کرتا آیا ہے۔

اطلاعات کے مطابق ایران میں 1979 میں آنے والے اسلامی انقلاب کے بعد سے یہ کسی ایرانی صدر کی جانب سے کسی بھی امریکی رہنما کے نام پہلا خط ہے۔

ایرانی ترجمان کا کہنا تھا کہ امریکہ اور ایران کے سفارتی تعلقات نہ ہونے کی وجہ سے یہ خط تہران میں سوئس سفارتخانے کو پہنچا دیا جائے گا جہاں سے اسے وائٹ ہاؤس بھیجا جائےگا۔

امریکہ نے ایران سے اپنے سفارتی تعلقات 1980 میں تہران میں امریکی سفارت خانے پر ایرانی عوام کے قبضے اور باون امریکیوں کو یرغمال بنائے جانے کے بعد منقطع کر لیئے تھے۔

تہران میں بی بی سی کی نمائندہ فرانسس ہیریسن کا کہنا ہے کہ چاہے یہ صرف ایک خط ہے لیکن اس کی اہمیت کا اندازہ اس بات سے لگایا جا سکتا ہے کہ یہ دونوں ممالک کے درمیان تین عشروں میں ہونے والا پہلا اعلٰی سطحی رابطہ ہے۔

ایرانی صدر نے اس خط کے ذریعے یہ تاثر بھی دینے کی کوشش کی ہے کہ وہ جوہری تنازعے کے حل کی خاطر امریکی صدر سمیت کسی سے بھی مذاکرات کر سکتے ہیں۔