پیر کو سخت قوانین کے حامی واشنگٹن اور بوسٹن میں مظاہرے کریں گے

مظاہرین اس بل کی مخالفت کر رہے تھے جسے گزشتہ سال نمائندگان نے منظور کیا تھا اور جس کے تحت امریکہ میں غیر قانونی طور پر رہنا سنگین جرم تصور کیا جائے گا۔

یہ مظاہرہ ایسے وقت ہوا ہے جب امریکی صدر جارج بش کانگریس پر زور دے رہے ہیں کہ وہ امیگریشن کے مسئلے پر تندی و تیزی میں کمی لائے۔ مبصرین کہتے ہیں کہ اس سال نومبر میں درمیانی مدت کے انتخابات میں یہ مسئلہ اہم انتخابی اشو کے طور پر سامنے آئے گا۔

امریکی سینیٹر اس موضوع پر تفصیلی بحث کرنے والے ہیں اور حکمراں جماعت کے کئی رکن بھی صدر بش کی اس تجویز کی مخالف کر رہے ہیں کہ میزبان کارکن کے نام سے ایک منصوبہ تیار کیا جائے۔

صدر بش کی تجویز کے مطابق غیر ملکیوں کو یہ اجازت ہوگی کہ وہ ایک خاص اور مقررہ مدت کے لیئے اور خاص ملازمتوں کے لیئے امریکہ میں رہ سکیں۔

اندازوں کے مطابق اس وقت امریکہ میں گیارہ اعشاریہ پانچ ملین لوگ غیر قانونی طور پر رہ رہے ہیں۔ان میں سے بہت سے زرعی سیکٹر، تعمیر شعبوں اور خدمات کی صنعتوں میں کام کرتے ہیں۔

گزشتہ روز صدر بش نے کہا تھا کہ پیغام یہ ہونا چاہیئے کہ اگر لوگ وہ کام کر رہے ہیں جو امریکی خود نہیں کرنا چاہتے تو ایک خاص مدت کے لیئے ایسے لوگوں کو امریکہ آنے دیا جائے۔

تاہم ان کی تجاویز کی مخالفت ان کی اپنی ہی جماعت کے کچھ ارکان کر رہے ہیں۔

دریں اثناء سخت امیگریشن کنٹرول کے حق اور مخالفت میں مظاہرے جاری رہنے کا امکان ہے۔ پیر کو سخت امیگریشن کے حامی واشنگٹن اور بوسٹن کی سڑکوں پر مظاہرے کریں گے۔