اب بھی ڈیڑھ لاکھ سے زائد امریکی فوج عراقی سرزمین پر موجود ہے

اتوار کی شام ٹیلی ویژن پر قوم سے خطاب کرتے ہوئے انہوں نے کہا کہ امریکی فوج کی عراق سے مشن کی تکمیل سے پہلے واپسی ایک غیردانشمندانہ اور بے شرمی پر مبنی اقدام ہو گا۔

انہوں نے کہا کہ ایسے اقدام سے مشرق وسطیٰ میں غلط سگنل جائے گا اور دہشت گردوں کی حوصلہ افزائی ہو گی۔

صدر بش نے کہا کہ وہ عراق سے فوجوں کی واپسی سے متعلق فیصلہ زمینی حقائق کی روشنی اور فوجی کمانڈروں کے مشورے سے کریں گے۔

انہوں نے امریکی قوم سے کہا کہ وہ حوصلہ نہ ہاریں اور ارادے پست نہ ہونے دیں۔ انہوں نے کہا کہ عراق میں جنگ کے دوران زخمی ہونے والے چند فوجیوں نے بھی انہیں ثابت قدم رہنے کی تلقین کی ہے۔

امریکی صدر نے کہا کہ گزشتہ ہفتے ہونے والے عراقی انتخابات مشرقِ وسطیٰ میں ایک نئے آئینی جمہوری دور کا آغاز ہیں۔

اگرچہ صدر بش نے تسلیم کیا کہ انتخابی عمل سے عراق میں جاری تشدد کی لہر میں کوئی کمی نہیں آئے گی تاہم انہوں نے کہا کہ عراقی انتخابات یہ ظاہر کرتے ہیں کہ اب امریکی کا ایک مضبوط اتحادی نہایت استقامت سے اس کے شانہ بشانہ کھڑا ہے۔

نامہ نگاروں کا کہنا ہے کہ عراق میں جنگ اور دہشت گردی کے خلاف دنیا بھر میں جاری کارروائی کے سلسلے میں بش انتظامیہ اندرونی طور پر انتہائی دباؤ میں ہے۔