مسٹر گانجی کو پانچ سال قبل بعض مضامین کی اشاعت کی پاداش میں جیل میں ڈال دیا گیا تھا۔ ان مضامین میں انہوں نے بعض سرکاری اہلکاروں پر ملک کے دانشوروں کو قتل کرنے کے الزامات عائد کیے تھے۔

مسٹر گانجی نے اس سال جون میں اپنی غیرمشروط رہائی کے لیے بھوک ہڑتال شروع کی تھی جس کے بعد ایرانی عدلیہ نے اس ہفتے کے شروع میں کہا تھا کہ انہوں نے بھوک ہڑتال ختم کر دی ہے۔

ان کی اہلیہ کا کہنا ہے کہ وہ اس بات کی تصدیق یا تردید نہیں کر سکتیں کیونکہ انہیں اپنے شوہر سے ملنے کی اجازت نہیں ہے۔

اقوام متحدہ کے سکٹریٹری جنرل اس سے پہلے بھی اسیر صحافی کی حالت پر تشویش کا اظہار کرچکے ہیں۔ اقوام متحدہ اور خود مسٹر کوفی عنان کی طرف سے یہ شدید ترین رد عمل ہے جو ایسے وقت میں ظاہر کیا جارہا ہے جب مسٹر گانجی کی حالت کے بارے میں یقین سے کچھ کہنا مشکل ہے۔

تہران کے ڈپٹی پراسیکیوٹر نے یہ اطلاع دی ہے کہ اسیر صحافی نے اپنی بھوک ہڑتال ختم کرکے اپنے ڈاکٹر کے ساتھ تعاون کرنے کا اعلان کیا ہے۔ جس ہسپتال میں مسٹر گانجی کا علاج ہو رہا ہے اس کے ترجمان نے بھی تصدیق کی ہے کہ کہ مسٹر گانجی طبی عملے کے ساتھ تعاون کررہے ہیں۔ مگر ترجمان نے ان کی بھوک ہڑتال پر کسی قسم کا تبصرہ کرنے سے انکار کردیا۔

بے یقینی کی ایک وجہ یہ بھی ہے کہ حالیہ ہفتوں میں ایرانی عدلیہ کے حکام متعدد با ر بھوک ہڑتال ختم ہونے اعلان کرچکے ہیں۔ یاد رہے کہ مسٹر گانجی اپنے عمل کی وجہ سے انسانی حقوق کےگروپوں اور اصلاح پسندوں کی نگاہوں کا مرکز بنے ہوئے ہیں۔ جبکہ امریکہ اور یوروپی برادری بھی ان کی رہائی اپیل کرچکی ہے۔