 |  گزشتہ تین دنوں میں چھ امریکی فوجی ہلاک ہو چکے ہیں۔ |
عراق میں سکیورٹی حکام کا کہنا ہے کہ انہیں بغداد سے باہر ایک اجتماعی قبر ملی ہے جس سے تیس مسخ شدہ لاشیں برآمد ہوئی ہیں۔حکام کے مطابق ان میں دو خواتین بھی شامل ہیں۔ پولیس کے حوالے سے ایک رپورٹ میں کہا گیا ہے کہ ’کویرئج‘ کے مقام پر برآمد ہونے والی یہ قبر تقریبا چھ ماہ پرانی ہے۔عراقی حکام کے مطابق یہ اجتماعی قبر مزاحمت کاروں کے خلاف ایک کاروائی کے دوران دریافت ہوئی۔ اس کارروائی میں ایک مشتبہ مزاحمت کار ہلاک اور تیرا افراد گرفتار کرلئے گئے ہیں۔ گرفتار ہونے والوں میں ایک مصری اور ایک سوڈانی باشندہ بھی شامل ہیں۔ اس دوران امریکی فوج کے ایک بیان میں کہا گیا ہے کہ عراق اردن سرحد کے قریب ’الرطبتہ‘ کے مقام پر بم دھماکے میں ایک امریکی فوجی ہلاک اور تین زخمی ہو گئے ہیں۔ اس فوجی کے ہلاک ہونے سے گزشتہ تین دن میں عراق میں مارے جانےوالے امریکی فوجیوں کی تعداد چھ ہو گئی ہے۔ ایک اور اطلاع کے مطابق عراقی وزارت داخلہ نے کہا ہے کہ ملک کے مرکزی بینک کے ایک اعلٰی افسر کو بغداد میں ’مستنصریہ‘ کے علاقے سے اغوا کر لیا گیا ہے۔ | 
یہ صفحہ دوست کو ای میل کیجیئے
پرِنٹ کریں
