صفدر ھمدانی بی بی سی اردو سروس لندن

برطانیہ کے ہندو مندروں میں بھی اشلوک اور بھجن فضا کو مسحور کرتے ہیں

ہندوازم اسلام اور عیسائیت کے بعد دنیا کا تیسرا بڑا مذہب ہے جس کے ماننے والوں کی دنیا بھر میں تعداد نو سو ملین سے زیادہ ہے جبکہ برطانیہ میں عیسائیت، اسلام اور یہودیت کے بعد ہندوازم چوتھا مقبول مذہب ہے اور یہاں اس کے پیروکاروں کی تعداد چار لاکھ سے زیادہ بتائ جاتی ہے۔

برطانیہ میں عیسائیت، اسلام اور یہودیت کے بعد ہندوازم چوتھا مقبول مذہب ہے اور یہاں اس کے پیروکاروں کی تعداد چار لاکھ سے زیادہ بتائ جاتی ہے۔

ہندوؤں کی زیادہ تعداد لیسٹر کے علاوہ لندن میں ہیرو اور ویمبلے کے علاقوں میں قیام پزیر ہے اور انہی علاقوں میں انکے مندروں کی تعداد زیادہ ہے۔

انیس سو پچاس تک ہندؤں کی کسی بڑی عبادت گاہ کے بارے میں کہیں سے کوئ معلومات نہیں ملتیں تا ہم پچاس کے پہلے عشرے کے اواخر میں برطانیہ میں سوامی نرائن ہندو مشن کے قیام کا پتہ چلتا ہے جس نے انیس سو ترپن میں مندر بنانے کی باقاعدہ کوشش کا آغاز کیا اور پھر سترہ سال بعد چودہ جون انیس سو ستر میں لندن کے علاقے ازلنگٹن میں پہلا ہندو مندر ایک چرچ کو تبدیل کر کے تعمیر کیا گیا۔

برطانیہ کا پہلا باقاعدہ مندر جو ایک چرچ کو تبدیل کر کے بنایا گیا

ستر کے عشرے میں ہی کینیا اور یوگنڈا سے بیدخل ہو کر بڑی تعداد میں ہندو برطانیہ آۓ اور اس طرح مندروں کی تعمیر میں بھی تیزی آئی اور پھر ہندؤں کے علاوہ جین، بودھوں اور ہرے کرشنا ہرے راما والوں نے بھی اپنے اپنے مندر تعمیر کیے۔

بھارت، سری لنکا، تھائ لینڈ اور نیپال سے باہر دنیا میں سب سے زیادہ مندر امریکہ میں ہیں جہاں ان کی تعداد چار سو سے زائد ہے جبکہ دوسرے نمبر پر برطانیہ ہے جہاں دو سو سے زیادہ مندر ہیں۔

برطانیہ میں سب سے زیادہ مندر لندن میں تیس اور اسکے بعد لیسٹر میں اٹھارہ ہیں۔آئر لینڈ میں بڑے مندر چار ویلز میں سات اور سکاٹ لینڈ میں چھ ہیں۔اسکے علاوہ برطانیہ بھر میں سری لنکا کے ہندؤں کے پچاس مندر اور ہرے راما ہرے کرشنا تحریک کے پچیس سے زائد مندر ہیں۔برطانیہ کے دیگر علاقے جہاں مندروں کی تعداد نسبتاً زیادہ ہے ان میں برمنگھم، بولٹن، کوونٹری، والسال اور بریڈ فورڈ شامل ہیں۔

بھارت سے باہر دنیا کا سب سے بڑا مندر ’سری سوامی نرائن مندر’ لندن کے علاقے نیسڈن میں ہے جسکا افتتاح بیس اگست انیس سو پچیانوے میں ہوا تھا۔

پورے کمپلیکس کا رقبہ ایک لاکھ دو ہزار اٹھارہ مربع فٹ ہے بھارت میںپانچ ہزار سے زائد ماہر نقاش اور کندہ کاروں نے ماربل کے چھبیس ہزار سے زیادہ مختلف سائز کے ٹکڑے تیار کیے جنہیں یہاں لندن لا کر تین سال میں جوڑا گیا

اسکی تعمیر میں لگ بھگ پانچ ہزار ٹن ماربل استعمال ہوا جسے بلغاریہ اور اٹلی سے ایک سو ساٹھ کنٹینروں میں انیس سو بیانوے سے چورانوے تک پہلے بھارت بھیجا گیا جہاں پانچ ہزار سے زائد ماہر نقاش اور کندہ کاروں نے اس ماربل کے چھبیس ہزار سے زیادہ مختلف سائز کے ٹکڑے تیار کیے جنہیں پھر لندن لایا گیا جہاں تین سال کے عرصے میں ان ٹکڑوں کو جوڑ کر یہ عظیم الشان مندر تعمیر کیا گیا جسے دیکھنے کے لیے دنیا کے کونے کونے سے لوگ یہاں آتے ہیں۔

انیس سو ترانوے سے پچانوے تک اس مندر سے ملحق دو ایکڑ سے زائد رقبے پر لکڑی کے کام کی منقش حویلی بنائ گئ جسکا اہم ترین حصہ عبادت کا وہ وسیع ہال ہے جس میں چار ہزار سے زیادہ لوگ بیک وقت عبادت کر سکتے ہیں۔

اس ہال میں کوئی ستون نہیں ہے اور بتایا جاتا ہے کہ ایک سو سال کے عرصے میں بھارت سمیت کسی ملک میں لکڑی کے منقش کام کی اتنی بڑی حویلی نہیں بنائی گئ۔ اس لکڑی پر منقش کام بھی بھارت میں ایک سو ستر ماہر چوب کاروں نے گجرات، راجھستان، اتر پردیش اور مہا راشٹر میں کیا ہے۔

نیسڈن کا سری سوامی نرائن مندر جسکی تعمیر میںپانچ ہزار ٹن ماربل استعمال ہوا

برطانیہ میں ہندؤں کے نو تعمیر شدہ مندر کا نام ’سری موروگان مندر’ ہے جسے تقریباً تین ملین پاؤنڈ کی لاگت سے مشرقی لندن میں مینر پارک کے علاقے میں بنایا گیا۔ سن دو ہزار میں اسکی تعمیر کا آغاز ہوا تھا اور انتیس مئی دو ہزار پانچ میں اسکا افتتاح ہوا ہے۔

اس مندر کے اندر تین مندر ہیں اور اس میں بھی استعمال کیا جانے والا ماربل اور گرینائٹ بھارت میں ہی پالش کیا گیا اور وہیں اس پر منقش کندہ کاری کر کے یہاں لندن لایا گیا۔ بتایا جاتا ہے کہ جنوبی ایشیا سے باہر یہ سب سے بڑا مندر ہے۔